Sivisuumik utaqqisarneq isumaqatigiinngitsutigaat

Nuummi Dronning Ingridip napparsinmavissuanut oqarasuaatikkut nakorsamut piffissamik inniminniiniarneq ajornanngitsuinnaaneq ajorpoq.

Qitora Holm Ketwap nappaateqarnini pillugu nakorsiartarfimmik atuisuuvoq. Sianernerit tamarluinnaasa sivisungaatsiartumik utaqqisarpoq.

- Nakorsiartarfimmut sianeraangama naliginnaavoq minutsini 45-ni utaqqisisarnera.

Qitora Holm Ketwa oqaatigaa ataasiarluni nalunaaqutaap akunnera ataaseq utaqqisinneqarami oqarasuaatini iliinnarsimaallugu, taamalu piffissamik inniminniinngitsoorsimalluni. Taamatut pinerit tamaasa utaqqerujussuartarneq utoqqalinersiuteqarluni akikitsuinnaanngilaq, isumaqarporlu inuppasuaqartoq aamma utaqqinerminni akissaajangaatsiartartunik.

Taamatulli oqarasuaatikkut nakorsamut inniminniisalersimaneq immikkoortortaqarfimmi nakorsaanerup aamma nakorsiartarfimmi pisortaasup Jesper S. Olesenip pitsaasutut isigaa.

-Siusinnerusukkut nakorsiarniartut oqarasuaatsikkut inniminniisanngikkallarmata nakorsiarniartut normumik tigusisarsimapput. Nakorsamullu misissortinnissaminnut ilaatigut nalunaaquttap akunneri tallimat utaqqisinnaasarlutik. Ullumikkut oqarasuaatikkut inniminniissinnaaneq atorneqartoq isumaqarpunga ajunngilluinnartoq, immikkoortortaqarfimmi nakorsaaneq Jesper Olesen oqarpoq.

Qitora Holm ketwa utoqqalinersiuteqarpoq, inniminniiniarnerminilu sivisuumik utaqqisarnini pillugu isumaqarpoq utaqqisarnerujussuaq pillugu aaqqisuteqartoqartariaqartoq.

Jesper Olesenip erseqqissarpaa nakorsiarniarlutik sianersimasut kingumut sianerfigineqarsinnaassanngitsut. Tamannalu akissaqannginnermik sipaarniarnermillu pissuteqartoq oqaatigalugu.