Siverth K. Heilmannip akinik isumaqatigiissuteqartarnerit akerlilerpai
Naalakkersuisoq Siverth K. Heilmann tamannalu pissutigalugu tusagassiorfinnut nalunaaruteqarluni Akinut isumaqatigiissuteqartarnerit suleqatigiiffeqartarnerillu sakkortunerpaamik akerlilerpai.
-Kalaallit Nunaanni Sulisitsisut Peqatigiiffiat inatsisinik unioqqutitsilluni akinut isumaqatigiissuteqarnissamut suleqatigiiffinnillu pilersitsinissamut atugassiisarnersut suleqataasarnersulluunniit misissuiffigineqartoq maluginiarpara. Akinik aalajangersaasarnerup niuerfimmi paasiuminartumi (ersarissumi) aammalu suliassaqarfiup avataanit sullissisut akornanni unammillerfiusumik ingerlanneqarnissaa pingaaruteqarpoq, Heilmann allappoq.
Nunatsinni sanaartornerni inatsisinik unioqqutitsilluni akinut isumaqatigiissuteqartarneq pinngitsoorsinnaanerlutigu kommunit, Namminersorlutik Oqartussat soqutigisaqaqatigiiffillu akornanni oqaloqatigiittoqarnissaanik kaammattuivoq.
-Namminersorlutik Oqartussat kommunillu sanaartugassanik ukiumut millioner koruuninik amerlasuunik nalilinnik neqerooruteqartitsisarput. Taamaattumik niuerfiup angusaqarfiusinnaasumik, aammalu namminersortut akornanni suliassap kimit isumagineqarnissaanik isumaqatigiissuteqartarnerit akinullu isumaqatigiissutinik atuiffiunngitsumik, minnerunngitsumillu neqerooruteqartitsinerit malillugit akinik aalajangersaasoqarnissaanut tatiginniffiusumik ingerlanneqarnissaa pingaaruteqartorujussuuvoq. Politiit aamma Unammilleqatigiinnermut Nakkutilliisut suliamik misissuinerata inernerisassaa qilanaaraara, Siverth K. Heilmann nassuiaaivoq.
GA-p unioqqutitsinernut peqataasimanini sakkortunerpaamik ilumuunnginnerarpaa, Unammilleqatigiinnermullu Nakkutilliisut politiillu kalerreeqqaaratik misissuiartornerat ingasagalugu. Misissuisoqarnissaami kalerriutigineqarsimagaluarpat GA-p oqartussaasut sutigut tamatigut suleqatigisimassagaluaramigit.
