Siverth K. Heilmann iluaallernermi kingorna napparsimmaviliaanneqartoq

Pinngortitamut, avatangiisinut ilisimatusarnermullu naalakkersuisoq, Siverth K. Heilmann, pingasunngornermi ullaap tungaani iluaallernermi kingorna napparsimmaviliaanneqarpoq. Naalakkersuisoqarfiup pisortaata Mette Skarregaard Pedersenip KNR-imut tamanna uppernarsarpaa.

AAMMA ATUARUK Siverth K. Heilmannip naalakkersuisunngornissani kissaatigisimanngikkaluaraa

Siverth K. Heilmannip iluaallernera pillugu Atassummut paasiniaratsigu, Siverth K. Heilmannip qanoq innera oqaaseqarfigisinnaanagu Bentiaraq Ottosenip ilisimatitsissutigaa.

AAMMA ATUARUK Simon Simonsen napparsimalluni sapaatit akunnerini sisamani sulinngiffeqassasoq

Naalakkersuisuni ilaasortat aappaat ullut marluk ingerlaneranni nappparsimasutut nalunaarutigineqarpoq, Ineqarnermut Attaveqaqatigiinnermullu naalakkersuisoq Simon Simonsen napparsimanini pillugu sapaatip-akunnerini sisamani tulliuttuni sulinngiffeqassasoq ippassaq nalunaarutigineqarpoq.

Simon Simonsen stresserpoq nakorsaminillu sulinngiffeqarallarnissaminik kaammattorneqarluni.

Mittarfiliortiternissat pillugit inatsisissatut siunnersuutip Inatsisartuni oqaluuserineqarnissaa ullut marluk sioqqullugit Simon Simonsen napparsimasutut nalunaarutigineqarpoq.

Aningaasaqarnermut naalakkersuisoq Vittus Qujaukitsoq, Nunat Avannarliit Siunnersuisoqatigiivisa Oslomi ataatsimiinneranni peqataasoq, Nuummut tamanna pillugu utiaarpoq.

Aningaasaqarnermut Naalakkersuisoqarfiup pisortaata Nicolai Sten Christensenip KNR-imut ilisimatitsissutigaa Vittus Qujaukitsup, mittarfiliortiternissat pillugit naalakkersuisut inatsisissatut siunnersuutaat saqqummiutissagaa, Simon Simonsenip napparsimanera pissutaalluni saqqummiussisunngorluni.