Siverth K. Heilmannip naalakkersuisunngornissani kissaatigisimanngikkaluaraa
Kim Kielsenip naalakkersuisunngortitsiniarneranut Inatsisartuni partiit piumassuseqarpallaarsimanngillat.
Siullermik Partii Naleraq akerlilersuisupilussuulluni Naalakkersuisooqatigiinnit tunuarpoq, tamatumalu kingorna Inuit Ataqatigiit Demokraatillu naalakkersuisooqatigiinnik nutaanik pilersitsinissaq aamma peqataaffigerusunngilaat.
Siverth K. Heilmannillu Naalakkersuisuni ilaasortaanissani aamma pilerigivallaarsimanngikkaa maanna paasinarsivoq. Qeqqata Kommuniani kommunalbestyrelsimut ilaasortaanerminit sulinngiffeqarallarnissamik qinnuteqaataani tamanna atuarneqarsinnaavoq.
AAMMA ATUARUK Atassut marlunnik naalakkersuisuutitaqalersoq
Naalakkersuisuini ilaasortatut Kim Kielsenimit toqqarneqarsimanini iluarinagu sulinngiffeqarallarnissamik qinnuteqaatimini, kommunalbestyrelsip ataatsimiinnermi oqaluusisaassani issuaavigineqartumi, taama allappoq:
- Tamatumunnga patsisaavoq, piumassuserinngisannik akuerisariaqarsimasannilli, Pinngortamut, Avatangiisinut Ilisimatusarnermullu Naalakkersuisunngortitaanera, taama allappoq.
Naalakkersuisunngortinneqartup inuusuttuunissaa kissaatigigaluaraa
Atassutip siulittaasua nassuiaavoq Naalakkersuisuni ilaasortassamik Atassummeersumik inuusuttumik toqqaasoqarnissaa inassutigisimagaluarlugu.
AAMMA ATUARUK Naalakkersuisut nutaat takukkit
Heilmannili naapertorlugu Naalakkersuisut siulittaasuata Kim Kielsenip misilittagalimmik naalakkersuisoqarnissaa pingaartissimavaa, taamaattumillu Atassumeersoq 65-inik ukioqartoq toqqarsimallugu.
Siverth K. Heilmannip kommunalbestyrelsimi sulineq pinngaartikkamiuk qimannakkallarnissaa ajuusaarutigalugu oqaatigaa.
