Atassut marlunnik naalakkersuisuutitaqalersoq
Naalakkersuisoqarfiit Kim Kielsenip nikititerpai. Atassut marlunnik naalakkersuisuni ilaasortaatitaqalerpoq. Naak Atassutip siulittaasuata Siverth K. Heilmannip ikinnerussuteqarluni naalakkersuisoqatigiiliornissaq nalornissutigeqqaaraluaraa, marlunnik naalakkersuisuutitaqalernissaq akuersisimaneranik pissuteqarluarsinnaavoq.
AAMMA ATUARUK Naalakkersuisut nutaat takukkit
Naalakkersuisoqarfik pingaaruteqarluinnartoq, tassalu aningaasaqarnermut naalakkersuisoqarfik Nunatta Qitornaanit akisussaaffigineqalerpoq. Taanna Vittus Qujaukitsup naalakkersuisuuffigilerlugu, taassuma Partii Naleqqap naalakkersuisoqatigiinnit tunuarnerata kingorna aningaasaqarnermut naalakkersuisoqarfik akisussaaffigigallaraluarpaa, akisussaaffeqarfillu aalajangersimasumik tigummiinnassagaa Kim Kielsenip massakkut aalajangerpaa.
Taakkua Siumumi ungaserujunngitsukkut siulittaasunngorniupput, Vittus Qujaukitsup nunanut allanut naalakkersuisuujunnaassutigisaanik. Vittus Qujaukitsoq taamani Siumumi ilaasortaajunnaarpoq namminerlu partiiliorluni. Kim Kielsenilli Vittus Qujaukitsullu pisimasoq maanna qaangersimarpasippaat suleqatigiilluarsinnaanngorsimarpasillutillu.
Kiinnat nutaat
Siumumeersut Nikkulaat Jeremiassen aamma Ane Lone Bagger Naalakkersuisuni nutaarsiassaapput. Nikkulaat Jeremiassenip naalakkersuisoqarfiit pingaarutilerujussuit akisussaaffigilerpai, tassa aalisarnermut, piniarnermut nunalerinermullu naalakkersuisoqarfiit. Taakku Erik Jensenimit naalakkersuisuuffigineqaraluarput, taannali aatsitassanut suliffeqarnermullu naalakkersuisuulerpoq. Tamanna akisussaaffikinnerulersutut taaneqarsinnaavoq, tamannalu danskit mittarfiliortiternissamut aningaasaleeqataanissaannut Erik Jensenip isumaqataannginnera peqqutaaqataasutut oqaatigineqarsinnaavoq.
Erik Jensenili naalakkersuisunut suli tassa ilaasortaavoq, naak siulittaasortik apeqqummi tassani isumaqatiginngikkaluarlugu.
Naalakkersuisut nutaartaasa aappaat tassaavoq Ane Lone Bagger, taanna Avannaani politikeritut ilisarisimaneqarluartuuvoq. Kommunimut siorna qinersigatta Palle Jerimiassenimit arfineq-marluinnarnik qinernikinnerulluni Avannaata Kommuniani borgmesterinngunngitsoorpoq.
AAMMA ATUARUK Løkkemut isumaqatigiissut Erik Jensenip Naalakkersuisuni taperserumanngikkaa
AAMMA ATUARUK Siumumi avissaartuuttoqanngilaq
