Siusinaartumik sulisinnaajunnaarnersiutillit sulilernissaat aporfippassuaqarpoq
Aningaasaqarnermut professorip Aningaasaqarnermullu Siunnersuisoqatigiinni siulittaasup, Torben M. Andersenip siunnersuutigineqartoq isumaqatigalugu oqaatigaa, nunatta karsiata artorsinneqannginnerulernissaa anguneqassammat.
Kisianni KANUKOKA-mit naleqquttunik suliffissaqarnersoq nalornissutigineqarpoq.
- Annikitsuinnarmik sulisinnaasoq innarluuteqarpat timimigulluunniit ajoquteqarpat taava sivikinnerusumik oqinnerusumilluunniit suliffimmik neqeroorfiginiarneqartussaassagami, taakkulu qanoq sumilu pilersinnissaat, tapiissuteqarluni pilersinneqassanersut suminngaanniillu suliffissat pilersinneqassanersut nalornissutigisorujussuuarput, KANUKOKA-p pisortaa, Hans Peder Barlach Christensen, oqarpoq.
Taassuma erseqqissarpaa, siunnersuutigineqartup siunertaa ajunngikkaluartoq, kisianni aamma suliffissaaleqisorpassuaqareernera eqqaasitsissutigalugu.
Isumaginninnermullu siunnersortit artorsinneqaqqinnissaat ernummatigaa.
- Sulisugut ilungersorlutik sulereertut qaavatigut suliakkiissutinik nanertisimaneqalissappata ajornartorsiummik qaangiinerunavianngilaq, Hans Peder Barlach Christensen KNR-imut oqarpoq.
Siusinaartumik sulisinnaajunnaarnersiutilinnut aaqqissuussineq 2008-mi kingullermik allanngortinneqarpoq. Ukiullu ingerlanerini siusinaartumik sulisinnaajunnaarnersiutillit sulisinnaasut amerliartorsimasut, naalakkersuisup Martha Lund Olsenip oqaatigaa.
Unamminartoqassaaq pisariaqarporli
Siusinaartumik sulisinnaajunnaarnersiutisiallit sulisinnaasut uninngaannannginnissaat nunattalu karsianut iluaqutaanissaat anguniarlugu Aningaasaqarnermut Siunnersuisoqatigiit siulittaasuata Torben M. Andersenip siunnersuut taperserpaa.
- Sulisitsisut suliassanik inunnut agguataarinerminni isumaginninnermik sulialinnik atorluaanissaminnut tunngavissaqarluarput, taamaalilluni nunatta karsia artorsinneqannginnerussammat, Torben M. Andersen oqarpoq.
Siusinaartumik sulisinnaajunnaarnersiutillit nunaqarfinni avinngarusimasuni suliffissarsinissaat ajornakusuussasoq, Torben M. Andersenip ilanngullugu oqaatigaa. Naak sulisinnaasut amerlasuut aningaasarsianik b-nik isertitallit sulilivitsinneqassagunik taakkununnga sulilernerat nutaarsiassaassanngimmat.
Taassuma isumaginninnermut siunersortit suliaqarnerulernissaat unamminartuussasoq qularinnginnerarpaa.
- Sulisunik ataasiakkaanik nalilersuisoqarnissaanik piumasaqarneq piffissamik atuiffiussaaq, tassungalu tunngatillugu piginnaaneqarfiunissaanut suliaq taamaattoq unamminartorujuussasoq isumaqatigilluinnarpara. Taamaammat isumassarsiap iluatsinnissaa sunniuteqalernissaalu unamminarluinnassaaq, Torben M. Andersen oqarpoq.