Siusinaartumik pensionit amerlineqalerput
Naak nerisassat ulluinnarnilu atugassat allat akii qaffakkiartorsimagaluartut, siusinaartumik pensionisiallit pisartagaat 1998-imili allanngorsimangillat. Isumaginninnermut naalakkersuisoq Maliina Abelsen oqarpoq, tamanna massakkut allanngortinneqassasoq.
Siusinaartumik pensionisiat 1998-imi ukiumut 88.000 koruuniupput, siornalu suli taamaallutik, naak pisiassat akii, inimut akiliutit allarpassuillu qaffassimagaluartut. Taamaammat siusinaarlutik pensionisiallit massakkut qaffaaffigineqarnissaat pisariaqartoq, Maliina Abelsen oqarpoq.
Pensionit 1000 koruuninik qaffannerisa aammalu pensionisiat akinut malinnaalersinnerisa saniatigut aamma siusinaartumik pensionisialik toqukkut qimaguppat, taassuma pensionisiai qimagaasumut qaammatini marlunnik nangittumik tunniunneqartassapput, taamaalilluni qimagaasup assersuutigalugu illumut akissaaruteriataannginnissaa qulakkeerniarlugu.
Peqqussummik allannguinisaq ipassaq siullermeerlugu oqaluuserineqarmat, eqaannerusumik aaqqiinissussinissaq Demokraatit ujartorpaat, siusinaartumik pensionisiallit pisinnaasut piffissap ilaani sulisinnaaleqqullugit, illuanik pensionisiat millillugit.
- Siusinaarlutik pensionisiallit sulerusuttut amerlammata, siusinaarluni pensionisiaqartarneq iluarsaanneqartariaqartoq, Naalakkersuisoqatigiit aallaqqaataaniilli oqaatigaat. Iluarsaaqqinnissaq aallartissaaq, Akileraartarneq atugarissaarnerlu pillugit isumalioqatigiissitat inassutaat tigugutsigit, Maliina Abelsen oqarpoq.
Siusinaartumik pensionisiat qaffaneqarnerat Nunatta Karsiata aningaasartuutaasa ukiumut 17 millioni koruuninik qaffannerannik kinguneqassaaq.
Inatsisartuni amerlanerussuteqartut allannguutissatut siunnersuut ilaqutariinnermut ataatsimiititaliamik suliassanngorlugu ingerlateqqippaat.
