Siunnersuut Kim Kielsenip isornartorsiorpaa
Siumup malittarisassaani immikkoortoq 16-imi ima allassimavoq, issuaaneq aallartippoq:
- Inatsisartunut qinersinerup kinguninngua partiip siulittaasuata partiip siulersuisuuneri inatsisartunilu ilaasortaatitat qinersinerup inernera kingunerisassaalu pillugit ataatsimiigiaqqusissavai, issuaaneq naavoq.
Tamanna Siumumi siulersuisuunernit allanngortinniarneqarpoq, qinersinerup naammassineraniit sapaatip-akunnera ataaseq qaangiutsinnagu ataatsimiigiaqqusisussanngortoqassalluni. Tamannali Kim Kielsenip apeqquserpaa:
- Eqqartugassatsinni siulersuisuunerninngaanniit siunnersuutigineqarpoq sapaatip-akunnera aatsaat qaangiuppat. Sapaatip-akunnera politikkip iluani sivisuupilussuuvoq, Kim Kielsen oqarpoq.
Allannguutissatut siunnersuutit ullumi taasissutigineqartussaapput. Siunnersuullu akuersissutigineqassappat siulersuisuunerit qinersinerup naammassineraniit sapaatip-akunnera qaangiutsinnagu ataatsimiigiaqquneqarsinnaassallutik.
“Kinguninngua”-mik sivisussusiliisimanerup assigiinngitsumik paasineqarsinnaanera pissutigalugu aalajangersimasumik sivisussusiliinissaq siunertaavoq. Allanngutissatulli siunnersuut akuersissutigineqassappat partii Siumut isumaqatigiinniarnissanut kingusinnaaratarsinnaavoq, Kim Kielsen oqarpoq:
- Partiit allat qinersinerup unnukkuani suliassatik ingerlaannaq aallartissavaat, ilassarsiorlutik, suleqatigiiffissarsiorlutik. Sooq Siumut tassani tunuarsimaassava? Sooq kingulliussava? Suleqatigiinnermut tunngatillugu uanga taqqamani taasisinnaatitaasutut oqarusuppunga kingusinaarpallaassaagut, Avatangiisinut Pinngortitamullu Naalakkersuisoq Kim Kielsen taama oqarpoq.
