Siunnersuisartussat siulliit allagartartaarput

Ilaqutariit meerartaartussanut ikiueqqaarnermik siunersuisartussanik pikkorissaanerit pingaarutillit siullersaat ingerlanneqarmat inuit 32-t siunnersuisartussatut allagartartaarput. Taakku allagartassatik unnugu tigoreerunikkit ilinniarsimasatik illoqarfimminni atorsinnaanngussavaat.

Pikkorissartut ullut tallimat pingasoriarlugit siorna oktobarimiilli pikkorissartinneqartalerput, suliniullu ”Ilaqutariit meerartaartussanik ikiuinasuarneq” –mik qulequtaqartinneqartoq maanna tamakkiisumik timitalerneqarsinnaanngussalluni. Innuttaasummi akornanni 25 procentersuit meeraatillutik sumiginnagaanermik misigisaqartarsimammata suliniutip iluaqutaalernissaa isumalluarfigineqaqaaq:

-Siunnersuisartussat innuttaasut sumiginnangaanissaannut akersuuttussatut takorloorneqarput. Taakku ilisimariigaat pitsanngorsarniarsimavagut, suleqatiminnut, angajoqqaanngortussallu sumiginnaanissamut ulorianartorsiutunut oqaloqatiginnittariaatsinik assigiinngitsunik sakkussaqalersissimallutigit. Siunnersuisartut akornanni misilittagaqarnerit misilittagakinnerusortatik siunnersortassavaat, suliniutillu kingunerisaanik angajoqqaanngortussanut taakkulu meerassaannut iluaqutaassaqineri qularutissaanngilaq, Birgit Hansen, suliniummut pisortaasoq taama unnersiorpoq.

Pikkorissartut juumuunit aamma ilinniartinneqarput. Angajoqqaanngortussammi piumagunikku suleriusissaanik siunnersuisartussanik pilersitsitsinissaq neqeroorutigineqartalissaaq. Imaassinnaavormi juumuumik, tarnip pissusaanik ilisimasalimmik imaluunniit allanik angajoqqaanngortussat pisariaqartitsissasut. Taamaammat angajoqqaanngortussanut suleriusissaq ilusilersoneqaleraangami taakku peqataatinneqarluinnarlutik piareersarneqarsinnaanngussallutik.

- Meerartaajusussaq suli arnami naaviniitsillugu suliniutit aallarnerneqartaleriissapput, naalugiarsuullu marlunnik ukioqalernissaata tungaanut ingerlanneqartassallutik. Piffissaliussaq qaangerneqaraangat oqartussaasut suliamik ingerlatseqqiisussat saaffigissavagut ilaqutariinngorlaallu pillugit ilisimariikkavut taakkununnga iluaqutaasalissallutik. Imaassinnaavoq ilaqutariit peqqissaasumit pulaallattaarneqarnerulissasoq, imaluunniit atuinerluttuusimanerit katsorsarneqarnerini suliaqaqqittoqartariaqassasoq imaluunniit meeraaraq siusinnerusukkut inerikkiartortikkumallugu meeqqerivimmut inissiaarneqarsinnaalissasoq. Ila suliniutitsinni periarfissarpassuit amerlaqaat, siunnersuisartussatullu pikkorissakkatta sakkussat tamakku tamarmik atorluarsinnaanngorsimallugit angerlartussaapput, Birgit Hansen knr.gl-imut taama unnersiorpoq.

Nunatsinni meeqqat sisamaagaangata ataaseq sumiginnangaanermik eqqugaasimasarpoq. Birgit Hansen-illumi sorpiaat peqqutaanersut ataasiakkaarlugit tikkuartuukkusunngilai, peqqutaasartummi amerlaqimmata. Nunatsinnili arnat inuusuttuararpassuit anaananngujaartarnerisa ajornartorsiutaaneri isertuutinngilai:

- Inuusuttuaqqammi ineriartupiloornerup nalaaniittarput. Taamaammat angaanngujaartartut ilaasa meeqqatik suli mikitillugit paarilluarnissaannut nukissaarukkajuttarput, inuusuttuaqqammi sinilluarnissartik pisariaqartittaqaat, naalungiarsuuteqaleraangatalu sininissamut piffissaarutipajaartarput tassalu qasoqqaannalersarlutik.

Taava inuusuttaqqat taakku naalungiarsuutiminnut  asanninnermik samminninnermilluunniit tunniussissallutik nukissaaruttuusisinnaasarput, tamatigullu meeqqap imminut tatiginnginnerulerneranik kinguneqarajuttarpoq allaallu meeqqap tarnimigut akornuteqalerneranik kinguneqarsinnaasarluni. Taamaammat ajornartorsiutit tamakku ikilisarnissaannut siunnersuisartut nutaat pilersitavut iluaqutigalugit ikilisarneqarsinnaanissaat neriuutigaara, Birgit Hansen oqarpoq, siunnersuisartooreersullu februari aallanerfigalugu pikkorissaqqinneqarsinnaalernissaat periarfissaalereernerarlugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat