Siunnersuisartussanik pilersitsinissaq siunnersuutigaat

Ilaatigut taama inerniliisoqarpoq, nukissiuutinik qanoq atorluaanerusinnaanerput CO2-millu mingutsitsinerup minnerulersinneqarnissaa pillugu sapaatip akunnerani matumani isumasioqatigiittoqarmat. Tamanna Sulisitsisut Peqatigiiffianni suliniutinik ataqatigiissaarisartup Jens K. Lyberthip ima oqaatigaa.

- Siunnersuisussanik pilersitsisoqarnissaa isumaqatigiissutigineqarpoq. Siunnersuisartussat namminersortuniissanersut imaluunniit pisortaniissanersut suli aalajangiunneqanngilaq. Kisianni suliassaannut tunngasut sumilu inissisimanissaanut tunngasut siunnersuusiorfigissavavut.

- Nunarsuarput tamakkerlugu nukimmik atuinerup annikillisarnissaa politikerit oqaluuseraat. Isumaqarpugullu suleqatigiilluarnikkut tamanna angusaqarfiulluarsinnaasoq, Jens K. Lyberth oqarpoq.

Isumasioqatigiinnermi inerniliunneqartut allagaqaatinngorlugit Namminersorlutik Oqartussanut, kommuninut sanasunut namminersortunut titartaasartunullu siunnersuisarfiusunut tunniunneqassapput. Matumani Nunatsinni nukissiuutinik atuinitta minnerulersinnissaa taamaalilluni pitsaanerusumik ataqatigiissaarneqarniassammat.