Siunnersortit nutaat ilinniarsimasunik tapersersuissappat
Inunnik isumaginninnermik peqqinnissaqarfimmilu atorfillit 17-it sineriammeersut Supervisoritut pikkorissartinneqarlutillu ilinnniaqqereerlutillu ippassaq tallimanngornermi allagartartaartinneqarput.
Inunnik isumaginninnermi peqqinnissaqarfimmiluunniit sulinissamut ilinniagaqarsimasut sulinerminnut atatillugu oqaloqateqarnissaminnullu pisariaqartitsisut Supervisorimik oqaloqateqarsinnaassapput.
Tassami inuusuttuulluni sumiginnagaq, ilaqutariilluunniit inuuniarnermikkut ajornartorsiuteqartuneersuulluni inuttut artornarsinnaasartoq, taakkununnga sullissisuuneq aamma oqimaassinnaasarpoq, tassami aalajangigassat siunnersuinissallu ilaatigut artornarsinnaasarput.
Supervisorit suliassanik kattussinikkut meeqqanik sumiginnakkanik ilaqutariinnillu nuna tamakkerlugu sullissisarput, supervisoritullu ilinniarnermikkut tamakkuninnga sullissisartunut oqaloqatiginninnissamut sakkulerneqartarlutik.
Inunnik isumaginninnermi sulisut, peqqinnissaqarfimmilu sulisut sulinerminnut atatillugu misigisimasatik pillugit tassunga atatillugu ilinniarsimasumik oqaloqateqartarnissaminnut periarfissinneqartarput, sulinerminnut atatillugu nukissaaruttutut misigisimappata oqaloqatigineqartarlutik.
Supervisoritullu pikkorissarsimasut 17-it maanna tassa sineriak tamakkerlugu tassa sulisinnaanngorput.
Ilaqutariinnermut Naalakkersuisoqarfimmi "Ikiuigasuarnissamut Qitiusumik Upalungaarsimaffik", Dansk Familieterapeutisk Institut suleqatigalugu pikkorissartitsisuuvoq, ukiualunni ingerlasimalluni, katillugit ullunut 34-nut agguarneqarsimalluni.
