Siunissaq pitsaanerusoq ujartorpaat
Ilinniaqqinnissamut paasissutissat amigaatigineqarnerat Sisimiuni innuttaasut naqinnernik ilisarinnissinnaanngitsut pingasunngormat oqallisigaat.
Ilinniagaqarnermut allagartaq inuuniarnermi pingaaruteqartoq, Krister Støvlbæk naqinnernik ilisarinnissinnaanngitsoq oqarpoq:
- Sanasunngorniassanguma imaluunniit qalipaasunngorniassanguma piumasarisimavaat Sanaartornermut Ilinniarfimmi piareersarfinnissara. Kisianni Piareersarfimmit ima akissutissarsivunga: ikiorsinnaanngilatsigit naqinnernik ilisarinnissinnaannginnerit pissutigalugu, Krister Støvlbæk oqarpoq.
Taanna naqinnernik ilisarinnissinnaanngitsut allat qulingiluat peqatigalugit Sisimiuni Taseralimmi pingasunngormat oqalliseqataavoq.
- Oqaluuserineqarnermi malunnarsivoq ilinniaqqikkusunnermi paasissutissat amigaatigineqartut, taavalu naqinnernik ilisarinnissinnaanngissutsimut misilitsittarneq nunatsinni amigaataasoq, ingammik kalaallisuinnaq oqaaseqartuni, oqallinnermik aaqqissuisoq Mette-Sofie Lerch oqarpoq.
Krister Støvlbæk 33-nik ukiulik, Lillehammerimi sisorartartuunermi nalaani naqinnernik ilisarinnissinnaanngitsuusutut misilinneqarpoq, atuartinneqarnermigullu qallunaatut, tuluttut nunanilu avannarlerni oqaatsinik maanna atuarsinnaavoq annikitsuinnarmillu allassinnaalluni.
Krister Støvlbæk isumaqarpoq, meeqqat atuarfianni naqinnernik ilisisarinnissinnaanngissutsimut misiliisalertoqartariaqartoq, tassami ilinniagaqarsimanermut allagartaq pingaaruteqarluinnarmat.
- Sanasuni suligama, soorlu suliassaaleqileraagata sooruna pappiaraqanngitsoq siulliullugu soraarsinneqartarpoq, naak sullarikkaluartoq, Krister Støvlbæk nassuiaavoq.
Taseralimmi maajip 11-ani naapittoqaqqissaaq. Atuarfinni ilinniarfinnilu assigiinngitsuni ilinniartitsisut tassani qaaqquneqartut, Mette-Sofie Lerch oqarpoq.
- Angusaqarusupput, ilinniarfinnut isersinnaanissamut periarfissinneqarusupput. Aamma meeqqat atuarfianni eqqummaarinneqarnerusariaqarneq ujartorpaat. Taamatut specialklassinut iliinnarnagit, meeqqat atuarfianni paasereerlugit ikiorneqarnissaat, Mette-Sofie Lerch oqarpoq.
Maajip 11-ani oqallittoqareernerani peqatigiiffiliortoqarnissaa sulissutigineqassasoq, Mette Sofie Lerchip aamma oqaatigaa.