Siunersiuinnginnermi: Qanoq qaleralinniartoqassava?

Aalisarnermut ataatsimiititaliap naalakkersuisoq akisussaasoq sinerissap qanittuani qaleralinniarneq pillugu siunersiuleraa.
Qaammatikkaartumik pisassat nungoreersut naalakkersuisoq sooq aalisartitsiinnarsimanersoq ataatsimiititaliap paaserusulluppaa. Assi © : KNR
novembarip 02-at 2020 12:31

Qeqertarsuup Tunuani Uummannallu eqqaani qaleralinniarneq sapaatit akunnerata siuliani pingasunngornermi ullormiit ullormut unitsinneqarpoq.

Uummannami qaleralinniarneq decembarip aallaqqaataani aallarteqqissasoq, Kalaallit Nunaanni Aalisarsinnaanermut Akuersissutinik Nakkutilliisoqarfik tusagassiuutinut nalunaarpoq.

Qeqertarsuulli Tunuarmiut qaqugu aalisaleqqissanersut Naalakkersuisut suli aalajannginngilaat.

Inatsisartut aalisarnermut ataatsimiititaliaata ukiup sinnerani sumiiffinni taakkunani ilumut qaleralinniartoqassanersoq siunersiuileruni paaserusuppaa.

Qaammatikkaartumillu pisassat nungoreersut naalakkersuisoq sooq aalisartitsiinnarsimanersoq aamma paaserusullugu.

- Naalakkersuisup atamaannartissimavai qaammatikkaartut malinnagit. Taava ataatsimiititaliamiit aperisoqartariaqalersimavoq suna tunngaviusimanersoq taavalu aamma ukiup siunneranut qanoq pilersaaruteqarnersoq, Aalisarnermut ataatsimiititaliap siulittaasua, Henrik Fleischer KNR-imut oqarpoq.

Sandgreen: Qoqassiinertut ippoq

Aalisarnerup ullormiit ullormut unitsinneqarnera KNAPK-p siulittaasuata akuersaarsinnaanngilluinnarpaa qoqassiinertullu nalilerlugu.

-Qoqassiinertut oqaatigineqarsinnaasumik matuseriataartoqarpoq. Aalisartut pisareriikkaminnik tunisisinnaajunnaarnerat tamatuma ilaatigut kingunerivaa, Henrik Sandgreen tallimanngormat oqarpoq.

KANUAANA KNAPK-lu aalisarneq unitsinneqassatillugu ullut pingasut sioqqullugit nalunaartoqariissasoq isumaqatigiissutigisimagaluaraat Henrik Sandgreen oqarpoq.

Siunersiuineq ualeru marluk qaangerlugu tanneq pingasut aallartippat Inatsisartut nittartagaatigut toqqannartumik malinnaaffigineqarsinnaavoq.

Ualeru siunersiuinissaq ammasumik siunersiuinerit sisamassarissavaat.