Siumut Sisimiut: KANUKOKA avinnagu

- KANUKOKA-p illoqarfinnut arlalinnut aggulunneqarnissaa naaggaarparput, Siumut Sisimiuni immikkoortortaqarfiata siulittaasua Lars Jørgen Kleist, tusagassiuutinut nalunaarummi ilaatigut allappoq, imalu nangilluni:

- Siumut Sisimiunii, KANUKOKA-p allaffissornikkut illoqarfinnut aggulunneqarnissaa pitsaanngitsumik kinguneqarnissaa ernummatigaarput. Allaffissornikkut sulisut pikkorissut - imminut ungasissumik suleqatigiillutik inissisimanissaat torrallataanngilaq tassami ilisimasat annertuumik annaaneqassapput - suleqatinullu qanilaarneq annaaneqassaaq, Lars Jørgen Kleist oqarpoq.

Kommunit kattussuunneqareernerisa kingorna Namminersorlutik Oqartussat akisussaaffiisa ilaat kommuninut ukiuni tulliuttuni nunneqartussaammata, KANUKOKA-mi allaffissornikkut pitsaasumik ingerlatsisoqarnissaa pinngitsoorneqarsinnaanngitsoq Siumut Sisimiut oqaatigaa.

KANUKOKA-p allaffeqarfiata pingasunngorlugu aggulunneqarnissaanut isuma taamaammat orniginanngitsoq, massakkutuullu qitiusumik allaffeqarfeqaannarnissaa orniginarnerusoq Siumup Sisimiuni immikkoortortaqarfiata kissaatigaa, tassa Qaqortumi, Sisimiuni Ilulissaniluunniit qitiusumik allaffeqarnissaa kissaatigalugu.