Siumut: Parisimi isumaqatigiissut aningaasanut inatsisissamut atsiornissatsinnut akornutaavoq
Aningaasanut inatsisissaaq pillugu isumaqatigiissusiortut sassarmarta parti ataaseq peqataanngilaq.
Partii Siumut isumaqatigiissummut kisiartaalluni atsioqataanngitsortaavoq.
Tamatumunnga Parisimi isumaqatigiissutip aningaasanut inatsit pillugu isumaqatigiissutissami ilaaneranut akerliunertik, partiip illua tungiliuttuusup siulittaasua, Erik Jensen tungavilersuivoq.
AAMMA ATUARUK Partiit sisamat aningaasanut inatsit pillugu isumaqatigiittut
- Imarisaata qanoq innera paasilluarsimatinnagu atsioqataanissatsinnut nangiaammersimagatta taanna apuupparput. Taava naalakkersuisup atsioqataasinnaanngitsugut oqarpoq. Uagut paasinninnerput malillugu anisitaasutut misigisimavugut, Erik Jensen oqarpoq.
Silap pissusiata allanngoriartornerata killilersimaarnissaanik isumaqatigiissut oqaaseqatigiinni ataatsimi ilaavoq, aningaasanulli inatsisikkut aningaasaliisoqassanngilaq.
Kisianni aningaasanut inatsimmi allassimasunngorpat pisussaaffiliissasoq, Siumumiit erseqqissaapput.
Siumulli Parisimi isumaqatigiissummut ilaalerneq nunatsinni inuussutissarsiornermut aningaasaqarnermullu qanoq kinguneqassanersoq pillugu paasissutissanik amigaateqarpoq.
Aamma nunatta isumaqatigiissummut peqataalersinnaanera Inatsisartut oqaluuserisimanngikkaat, Erik Jensenip eqqaasitsissutigaa.
Aningaasanullu inatsisissamut isumaqatigiissummut ilaatinneratigut Naalakkersuisut isumaqatigiissut tunuatigoorullugu ilanngunniarsarigaat, Erik Jensen isumaqarpoq.
- Inatsisartutigullu suli eqqartorsimatinnagu uuma isumaqatigiissutip suna imarineraa aalajangiinnartoqarsinnaanngilaq aningaasanut inatsimmi akuersisutut tikkuarluta.
Aningaasanut inatsisissaq pitsaaqutilik
Siumut aningaasanut inatsisissaq pillugu isumaqatigiinniarnerni qulequttanik 24-nik ilanngukkusutaqarsimavoq .
Qulequttat arlallit, Siumup aningasanut inatsimmi ilanngukkusutai ilaanngillat, soorlu ilaatigut Sisimiut Kangerlussuullu akornanni aqqusinniornerup aningaasalerneqarnissaa taavalu innarluutillit oqaaseqartartuannut aningaasaliinerunissaq.
Isumaqatigiissummili arlalinnik pitsaasoqartoq erseqqissaavoq. Tamakkununnga Qaqortumi mittarfissap takissusissaa, utoqqalinersiutillit pitsaanerusumik atugaqalernissaat taavalu sinerissamut qanittumi qaleralittanut akitsuutip peernissaa ilaapput.
Taamaammat aningaasanut inatsisissap marlunngorpat inaarummik suliarineqalerpat Siumut akuerseqataanissaq mattutivinngilaa.
- Paasissutissat kingulliit utaqqivagut, taakkualu oqaluusereerutsigit takujumaarparput marlunngorpat inaarutaasumik taasinermi qanoq inissisimassanerluta.