Siumut: Ove Karl aamma Kuupik pinngitsuutinneqavinngillat
Karl Lyberth isumaqarpoq inatsisitigut pinngitsuutinneqarneq tassaanngitsoq ileqqorissaarnikkut akuersaarneqarneq:
- Inatsisilerituunut piumasaqarsimavugut taanna kikkunnulluunniit attuumassuteqanngitsunit misissorneqassasoq. Taava naliliipput inatsisitigut unioqqutitsisoqarsimanngitsoq. Tamanna tusaatissatut tiguarput, aamma pissusissamisoorpoq, taanna akornutissaqartinngilluinnarparput.
Siumut sinnerlugu Inatsisartunut ilaasortaq Karl Lyberth oqarpoq, nangillunilu:
- Nammineq Naalakkersuisunut ilaasortaajutigaluni taavalu aamma inuttut soqutigisinnaasat assigiinngitsut attumassuteqannginnissaat uani pineqarput. Tassa Naalakkersuisunut ilaasortaagaanni taava nammineq aningaasatigut, suliffeqarfikkut aningaasatigut soqutigisat imminnut attuumanginnissaat taanna pingaartupilussuartut oqaatigisariaqarpoq, Karl Lyberth oqarpoq.
Karl Lyberth aamma Kristian Jeremiassen tusagassiuutinut nalunaarummi ilaatigut ima allapput:
- Kukkunersiuinermi ataatsimiititaliami ilaasortatut oqaatigissavarput Naalakkersuisut Siulittaasuata aanna Inuussutissarsiornermut Naalakkersuisup aatsitassatigut soqutigisaasa nuliaasunut akuersissummik tunniussaqarsimaneq inatsisilerituunit misissuisitsereernerup kingorna kingorna inatsisitigut pinngitsuutinneqarneq akuerigatsigu imatut paasineqassanngilaq uagut inuiaqatigiinnut ileqqorissaarnertut politikkikkullu akisussaassuseqarnermik suliaqarnertut isigineqassasoq.
Pisoq pillugu oqallittoqareeqimmat, Kukkunersiuinermut Ataatsimiititaliaq eqqartuussisuserisut Nuna Advokaterimeersut aqqutigalugit siorna oktobarimi misissuisitsivoq, misissuinerullu tassa inerneraa naalakkersuisunut ilaasortat taakku marluk iliuuserisimasaat isornartoqanngitsoq, tassa inatsisitigut pinngitsuutinneqaramik.
Ove Karl Berthelsenip Kamma ApS-imi piginneqataaneranik KNR-ip qulaajaaneranut atatillugu inuttaa kissaateqarnikuuvoq, assersuutigalugu politikerit inuussutissarsiornikkut soqutigisaasa nittartakkakkut takuneqarsinnaanngortinnerisigut, ammanerusumik ingerlatsisoqalissasoq.
Ammanerusumillu ingerlatsisoqalernissaa Kukkunersiuinermik Ataatsimiititaliap Kuupik Kleistimik maajip naannaginnerani isumasioqateqarnissaani ilaatineqarumaarpoq.