Siumup Partii Naleqqallu Danmarkimik suleqateqarsinnaaneq iluaraat
Kisianni mittarfiliortiternissamik suliassaq taama angitigitillugu nunanut allanut sillimaniarnermullu politikkikkut sunniuteqarsinnaaneranik statsministerip naliliineranut partiit taakkua ilasseranngillat.
Mittarfiliortiternerup aningaasalersornerani Danmarki peqataasinnaanersoq taamaassappallu qanoq tamanna pissanersoq misissussallugu
Statsminister Lars Løkke Rasmussen aamma naalakkersuisut siulittaasuat Kim Kielsen
pingasunngornermi juunip 13-anni isumaqatigiipput.
Tamannalu Siumumeersup Anders Olsen nuannaarutigaa:
- Tassalu isumaqarpunga ajunngilluinnartoq, aamma taamatut nalunaaruteqarneq, Anders Olsen taama oqarpoq.
Naalakkrsuisoqataasunilu Partii Naleqqami taama aamma isumaqarput.
- Ilaatigut 6 milliardit angullugit akiitsoqalersinnaanerput, sanaartornikkut allarpassuartigullu inerisaaqqinnissamik innarliingaatsiarsinnaammat, taamatut periarfissarsiortoqarnera soorunami toqqissiallannarpoq, Jens Napaattooq taama oqarpoq.
Lars Løkke Rasmussen naalagaaffeqatigiit ataatsimeereerneranni oqarpoq, Mittarfiliortiterluni suliassat taama angitigimmata aningaasalersuinissartaa nunani allaniillu suleqatissanik toqqaaneq apeqqutaallutik, tamanna nunanut allanut aamma sillimaniarnikkut politikkikkut attuumassuteqarsinnaasoq, nunatsinni aamma nunatta avataani.
AAMMA ATUARUK Danskit mittarfinnut aningaasaliinissaanut periarfissat Kielsenip Løkkellu misissorniarpaat
Tassalu Naalagaaffeqatigiit tamarmik nunanut allanut attaveqarnerat danskit naalakkersuisuisa akisussaaffigigamikku, naggaterpiaatigut akuleruttariaqalersinnaasut, taassuma oqaatigaa.
Tamannalu Jens Napaattuup tupigusuutigaa. Taassuma tikkuarpaa, Danmark Kinamik, ukiuni kingullerni ineriartupiloorsimasumik, ukiorpassuarni maannamullu suli niueqateqartoq.
Niueqateqarnerlu Danmarkip iluaqutigisimagaa erseqqissaavoq kissaatigalugulu nunarput aamma taamak periarfissaqassasoq.
- nunanut allanut politikkimut aamma peqataanerunissarput, nunarsuarmioqataasutut peqataanerujartuinnarnitsinni tamakkua ersiutaasut ilagiinnaraat, aporfissalersorneqassanngillat, Jens Napaattooq taama oqarpoq.
Siumut statsministerip oqaasiinut naaperiaaneruvoq.
- Siumuminngaanniit pingaartipparput, taanna isuma qaqilerneqartoq danskit naalakkersuisuininngaanniit. Pituttuisuusarisaqanngilaq taanna nunatta ineriartorteqqinneqarnissaanut tunngatillugu, Siumumeersoq Anders Olsen taama Nauja Møllerimut oqarpoq.
