Hans Egedep eqqaassutissaa junip 21-ani unnuakkut serlersaarfigineqarpoq. Pisumut atatillugu pasineqartut maanna sisamaapput.Assi: Scanpix

Siumut Nuuk borgmesteri isornartorsioraat

Hans Egedep eqqaassutissaa inoqatinut attaveqaatit atorlugit oqallisigineqaleruttorfiani Kommuneqarfik Sermersuup innuttaasunik tusarniaanini aallartippaa. Tusarniaanerli Siumup Nuummi immikkoortortaqarfiata sivikingaa.

Eqqaassutissap qanoq pineqarnissaa pillugu Kommuneqarfik Sermersuumi borgmesteri, Charlotte Ludvigsen, sapaatit akunnera kingulleq innuttaassunut taasititsinissamik aallartitsivoq, taamalillutik Kommuneqarfik Sermersuumi innutaasut eqqaassutissap qanoq pineqarnissaa isummerfigisinnaalerpaat.

AAMMA ATUARUK Sådan kan Sermersooq-borgerne påvirke Hans Egede-statuens fremtid  

Siumulli Nuummi immikkoortortaqarfiata periuseq nittartakkakkut ingerlanneqartoq isornartorsiopaat. Piffissaliussaq sapaatit akunneri pingasut sivikingaat inuillu amerlasuut peqataasinnaassannginnerarlugit.

- Isumaqapugut tusarniaaneq pingaaruteqartoq, aamma sapanginneqartussaassapput inupparujussuit peqataatinneqarsinnaanavianngillat taamatut periuseq atorlugu, Siumut Nuummi siulittaasoq, Inga Dora G. Markussen, KNR-imut oqarpoq.

Hans Egedep eqqaassutissaanut taasineq

 

  • Kommuneqarfik Sermersuumi innuttaasut julip pingajuanniit 21-anut eqqaassutissap peerneqarnissaa inissisimaffimminiiginnarnissaaluunniit taasiffigisinnaavaat

 

  • Juulip 22-aniit aggutsip qulingat ilanngullugu eqqaassutissap nuunneqassagaluaruni sumut nuunneqarnissaa, maannalu inissisimaffiata qanoq pineqarnissaa taasissutigineqassaaq.

 

  • Taamalisoqareerpat akissutit siunnersuutillu katersorneqassapput. Aningaasaqarnermut Inuussutissarsiornermullu Ataatsimiititaliap inernerit aggutsip 20-ani saqqummiutissavai.

 

  • Kommunalbestyrelse septembarip aappaani aalajangiissaaq

 

Tusarfik: Kommuneqarfik Sermersooq.

Piffissaliussap sivikinnera borgmesterip nassuerutigaa, inuilli peqataatissallugit qularinagu. Utoqqaat illuanni najugaqartut utoqqaat nammineersinnaanerusullu inaanni najugallit taasiffissanik pajunneqassapput, meeqqallu titartaasinnaallutik.

- Piffissaq sapaatit akunneri pingasut sivikikkaluartut, naatsorsuutigaarput tikissinnaasagut tamaasa tikissinnassallutigit, Charlotte Ludvigsen, KNR-imut oqarpoq.

Nikingangaatsiartariaqartut

Taasinerit inernerisa nikingangaatsiarnissaat borgmesterip aalajangiiniarnermi takorusuppaa. 75 procentimillu siusinnerusukkut oqarnera, Siumut Nuummiit suminngaannernersoq paasiuminaatsippaat.

- Siornatigut kisitsit 75 procenti suminngaanneernersoq takunikuunngilarput, Inga Dora G. Markussen oqarpoq.

AAMMA ATUARUK Oqallittut Hans Egedemut eqqaassutissap toqqavia aalaqqajutsikkaat

Borgmesterilli taama oqarsimanini silaannarmiit tigullugu assersuutitullu atorsimallugu oqaatigaa.

- 75 procentioqqissaartariaqanngitsoq oqariartorpunga, assersuutitut atuinnarnikuuara taanna. Kisianni oqarpunga annertuumik assigiingissuteqartariaqarpoq aalajangiissagutta, Charlotte Ludvigsen oqarpoq. 

Peqataatinneqannginneq

Tusarniaaneq maanna ingerlasoq innuttaasunik peqataatitsinnginerarlugu Siumut Nuup isornartorsiorpaa. Sulinngiffeqarnerup nalaaniinnera ilaatigut tunngavilersuutigalugu. Borgmesterilli peqataatitsinerarnini suli illersorpaa.

- Innuttaasunik peqataatitsineruvoq tusarniaaneruvoq, taava politikkikkut aalajangingassartaa kingusinnerusukkut takkukkumaarpoq, Charlotte Ludvigsen oqarpoq.

Innuttaasunut tusarniaaneq juulip pingajuani aallartittoq juulip 21-ata tungaanut ingerlanneqassaaq. Taassumalu kingorna inuttaasunut taasititseqqinneq pereerpat Kommunal bestyrelsep septembarimi ataatsimiinnermini eqqaassutissap qanoq pineqarnissaa aalajangiiffigissavaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat