Siumut: Naalakkersuisooqatigiit assigiinngisitsipput

Siumumeersut arlallit isumaqarput, partiit allat tamarmik siunnersuummut sunniuteqartussaanngivissumut tapersersuinermikkut, partiit nukittunerunertik takutikkaat.

- Tupinnartorujussuuvoq, suleqatigiinneq tunngavigiinnarlugu akuersiniaannarluni akuersisoqartoq misigisimanarluni, Siumumeersoq Doris Jakobsen oqarpoq.

Siunnersuut, Siumup isumaa malillugu akuersissutigineqartariaqanngikkaluartoq, Kattusseqatigiit Partiianneersumit Knud Fleischer-imit saqqummiunneqarpoq, amerlanerusut ilinnialernissamut piareersimaneruleqqullugit, Atuarfitsialammik naliliigallarnermi tikkuussissutigineqartunut Naalakkersuisut ilumoorusseqqullugit piumaffigineqarnissaannik imaqarluni.

Meeqqat Atuarfiata pitsanngorsarneqartuarnissaa Siumup isumaqatigilluinnarpaa, siunnersuulli pisariaqanngilluinnartutut isigaat, Atuarfitsiammik naliliigallarnermit inassuteqaatit Naalakkersuisunit suliarineqarlutik aallartereerneqarsimammata.

- Tassani ersersinneqaannarpoq, immikkoortitsineq annertoorujussuusoq. Uagut Siumumi ikinnerussuteqarluta sulianut ingerlareersunut tunngasunut siunnersuuteqaraluarutta, ingerlaannarluta itigartinneqarnissarput qularutissaanngilluinnarpoq, Doris Jakobsen oqarpoq

Taassuma isornartorsiutaa parteeqataanit arlalinnit taperserneqarpoq. Tassalu isornartorsiuineq aamma Demokraatinut tunngasuuvoq. Kisianni ilinniartitaarneq pillugu oqaaseqartartup, Andreas Uldumip, taamaannginnerarpaa.

- Naamik taamaattoqanngilluinnarpoq. Taamatut malersugaasutut misigisimaneq tunngavissaqanngilluinnartutut uanga isigaara. Siunnersuuteqartoqaraangat gruppitsinni eqqartortarpagut, pitsaasutullu isigisavut ataatsimiititaliami ingerlateqqitassatut innersuussutigisarpagut, pitsaanngissimagaangatali itigartittarlugit, Andreas Uldum oqarpoq.

Katusseqatigiit Partiianniit siunnersuut Naalakkersuisunit tapersersorneqarpoq, ilinniartitaanermulli naalakkersuisup, Mimi Karlsenip nassuerutigaa, suliarileriikkaminnik suliassinneqaramik, tassalu Atuarfitsialammik naliliigallarnermi inerniliussat piviusunngortinniaqqullugit.

Mimi Karlsenip isumaa naapertorlugu tamakkua Akileraartarnermut Atugarissaarnermullu Ataatsimiititaliap inassuteqaataanut saqummiunneqaqqammersunut eqqaanaqaat. Inassutigineqartunummi ilaapput, atuartut ataasiakkaat immikkuullarissusiat aallaavigineqarnerussasoq, nunaqarfinnilu atuarfiit nukittorsarneqassasut.

Siunnersuut Inatsisartut aappassaaneerlugu marsip 31-ani oqaluuserissavaat.