Partii Naleqqap USA-mut qanillattornera pillugu Siumut: Tulluanngilaq
- Siunissami naalagaaffinnguissagutta nunamut allamut pituttorsimanissarput tulluanngilaq.
Karl Kristian Kruse, Siumut sinnerlugu oqaaseqartartoq oqarpoq.
Partii Naleqqap USA-mit tapersersorneqarluta naalagaaffinngornissatsinnik misissuinissamik kissaataanut qisuariarneruvoq.
Tassami Donald Trump tassanngaarnartumik nalunaarmat Kalaallit Nunaat pisiariumallugu partii Naleraq isumassarsivoq: Danmarkimit tapiissutit USA-mit tiguneqarsinnaanerat piviusorsiortuunersoq paasiniassallugu. Taarsiullugu Kalaallit Nunaata Ruslandip Kinallu soqutigisaaat itigartissavai.
LÆS OGSÅ Naleraq:USAmik isumqatigiiniarsinnaaneq misissorneqartariaqarpoq
Kisianni Siumut taamatut ingerlajumanngilaq. Kalaallit Nunaat naalagaffinngussappat inuiaqatigiit isumaqatigiiffigineqartariaqarput nunamit allamit tapiiffgineqarnissaq pinnagu, Karl Kristian Kruse isumaqarpoq.
Tassami danskit tapiissutigisartagaat Amerikkamiut tapiissutigisartagaannik taarsissallugit tulluartuusorinngilaa.
- Nunanik allanik Naalagaaffeqatigiinnermillu suleqateqarneq periarfissaajuarpoq, isumaqarpungalu tamanna massakkutut isikkoqarluni nanginneqartariaqartoq, Karl Kristian Kruse oqarpoq.
Nunalli allat suleqatiginissaat ammaffigaa, pingaartumik Danmarkip USAllu.
Sianiissalikaarneq killeqanngitsoq
Partii Atassummi aamma USA-mik isumaqatigiinniuteqarnissaq qiimmattaatigineqanngilaq, sianiissalikaarneruneraramikku.
Atassutip Folketingimut qinigassanngortitaata Nikolaj Rosingip aarleqqutigaa USA’p Kalaallit Nunaannik piserusunnera Naalagaaffeqatigiinnermi avissaartuunnermik kinguneqassasoq. Aamma isumaqarpoq Kalaallit Nunaanni akeqanngitsumik ilinniagaqarsinnaaneq, pinngortitami ajunaarnersuaqarnerani ikiorsiineq isumaginninnikkullu unammilligassat Danmarkikkoortumik naammassineqartarnerat naalagaaffinngornikkut iginneqassanngitsut.
-Naalagaaffeqatigiinnut ilaavugut, aningaasaqarnikkullu ikorfartorneqarluta. Kiffaanngissuseqarpugut inuillu tamat oqartussaaqataaffigisaanniilluta. Qaavatigullu Kunngeqarfiup inatsisartuini marlunnik sinniisoqartarluta. Ajornartorsiulerfimmilu assersuutigalugu pinngortitami ajunaarnersuartoqartillugu, aammalu isumaginninnikkut ikiorserneqarsinnaasarluta, Nikolaj Rosing tusagassiuutinut nalunaarummi oqarpoq, nangillunilu:
- Naalagaaffeqatigiinnerup iluani ataatsimoorta, susassaqarfigullu nukittorsaqqillugit. Amerlanertigummi aatsaat annaasaqareernerup kingorna periarfissarisimasagut paasilertarpagut.