Naleraq: USA-mik isumaqatigiinniarsinnaaneq misissorneqartariaqarpoq
Præsident Trumpip nunarput pisiariumallugu nalunaarmalli aallassassimaarneq suli unikaallanngilaq.
Trumpip pisiarinnikkumanera Nunatta namminersortuulluni naalagaafinngornissaanut iluaqutigineqarsinaanersoq, Partii Naleqqameersup Pele Brobergip misisoqquaa:
- USA-p pisiumanera atorlugu taakkua allaanerusumik oqaloqatigisinnanerpagut, namminersuleriartornitsinni illersorneqarnissarput aningaasarsiornittalu aalaakkaasuunissaa qulakkerlugu, Partii Naleqqameersoq Pele Broberg oqarpoq.
Lynge: Trumpip isumaliortersuutaani periarfissaalersut iluatsittariaqarpagut
Taassuma siunnersuutaa tassaavoq, USA-p nunatta namminersortuulersup aningaasaqarnissaa qulakkeersinnaaneraa paasiniarlugu isumaqatigiinniarfigineqassasoq. Nunarput USA-mut ilaalissasoq takorluunngilaa. Kisianni Trumpip pisianriinninnissamik neqerooruteqarnermigut USA-p Rusland Kinalu Nunatsinniit ningorsimatikkumallugit Danmarkimiit ataatsimoortumik tapiissutit taarserusussagai piviusorsiortuusoq, taanna isumaqarpoq.
Demokraatineersoq Steen Lynge Brobergip eqqarsaataanut assigusunik aamma eqqarsaateqarpoq. Naalakkersuisutunut apeqquterpaalutsigut Naalakkersuisut Trump tikerarsarniarnerat taassuma paaserusuppaa:
- Taamaasillutillu USA-mi pisortat paasitillugit Kalaallit Nunaata sulissutigigaa aningaasarsiornikkut nammiliilernissaq danskit bloktilskudiat isumalluutigiunnaarlugu? Steen Lynge taama aperivoq.
Trumpip nunatsinnik pisierusunneratigut periarfissaalersut nunatta iluatsittariaarai, ilaatigut taama aperinerminut tunngavilersuivoq.
Martinussen: Naalagaaffeqatigiinneq kaasarfimmiussanik aningaasarsiorfiinnaanngiIaq
Nunatta namminersulerniissaanik apeqqummi Suleqatigiissitsisut illuatungaaniipput, Partii Naleqqallu siunnersuutaanut akerlioqaat:
- Naalagaaffeqatigiinneq kaasarfimmiussanik aningaasarsiorfiinnaanngitsoq, Tillie Martinussen, partiini sinnerlugu Inatsisartunut ilaasortaasoq allappoq.
Namminnersulissagaluarutta tamanna ataatsimoortunik tapiissutinut taartaasussanik nunatsinni aningaasarsiornerulernikkut pisariaqartoq, partii isumaqarpoq, imaaanngitsoq nunamit allamik ataatsimoortunik nutaanik tapiissutisisalernikkut.
AAMMA ATUARUK Trumpip Nunatta tunineqarnissaata itigartitsissutigineqareerneratigut tikeraarnissani kinguartikkaa
Taava partiip taassuma nunarput Danmark alarlugu USA-mik sueqatiginnilissagaluarpat, ilinniartitaanerup peqqinnissaqarfiullu qanoq ilinissaat ernumanartippaa:
- Nunatta inuusuttorpassuit Danmarkimi ilinniarfinnut assigiinngitsunukartittarpai. tamannalu akeqanngilaq, Tillie Martinussen tikkuaavoq.