Siumut: Imarsiornermik Ilinniarfik matunagu
Imarsiornermik Ilinniarfiup Paamiuniittup matuneqarnissaanik isuma Siumut sinnerlugu inatsisartuni ilaasortamit Kim Kielsenimut orniginartinneqanngilaq.
Kim Kielsen isumaqarpoq qulaajaalluni misissuisoqartariaqartoq.
- Tassa arlaatigut misisuisoqarniarli, oqaannarnani massakkut sipaarniarpugut sunaaku patsisaasut qulaajarneqartariaqarput taqqanna orniginartinneqannginnera peqqutigalugu. Una kissaatiginaanarpoq nunatsinniinissaa taanna pingaaruteqartupilussuuvoq taamaaliunngikkutta alloriarnernik marlunnik utersaassaagut, Kim Kielsen oqarpoq.
Kim Kielsen isumaqarpoq Imarsiornermik Ilinniarfimmik matusinnginnermi qiviagassat ilagigaat imaatigut angallannerup ukiuni kingullerni annikillinera, kiisalu matusinikkut kalaallisuinnaq oqaasillit eqqugaanissaat.
- Nunatsinninngaannit ilinniarfik nuunneqassappat immikkut aamma allagartaqaramik taakkua ilinniartitsinissamut tunngatillugu, annaassagatsigit taannali orniginanngeqaaq. Kalaallisuinnaq oqaatillit mattunneqassapput taavalu aamma naalaganngorniat atuarfianni allagartartaareernikuusimasut ukiut tallimakkaarlugit allagartatik nutartertarpaat, kalaallisuinnarlu aamma oqaasillit taakkua akornanniimmata Danmarkimi allagartatik nutarsissagunikku nutserisoqanngikkunik annaassagaat taanna. Taamak oqarpoq Kim Kielsen Inatsisartuni ilaasortaq.
- Imarsiornermik Ilinniarfiup matuneqarnissaa pilersaarutaanngilaq, kisianni ilinniartut ikippallaat ilinniarnerat Danmarkimi ingerlanneqartalernissaat pilersaarutaavoq, Ilinniartitaanermut naalakkersuisoq Mimi Karlsen erseqqissaavoq
