Siumut akissutinik ersarissunik amigaateqarpoq

Naalakkersuisut taama kissaateqarnerat illuatungiliuttut partiit annersaannit tigulluarneqarpoq. Taamaakkaluartoq Naalakkersuisut siulittaasuata ammaanersiorluni oqaaseqaataani arlalitsigut akissutinik amigaateqartoq Siumumit oqaatigineqarpoq.

Naalakkersuisut siulittaasuata, Kuupik Kleistip ammaanersiorluni oqaaseqaataanni akissutissat ersarissut Siumumit amigaatigineqarput.

- Naalakkersuisut siulittaasuata ammaanersiorluni oqalugiaataa qulequtaanerujussuusutut oqaatigineqarsinnaavoq. Aammalu inuiaqatigiinni aningaasarsiornitta ilorraap tungaanut aaqqiissutissanik tigussaasunik oqariartuuteqarani. Tamannalu uggornarpoq amigaatiginarlunilu, Siumup siuluittaasua Aleqa Hammond oqarpoq.

Nangillunilu oqaatigalugu, Nunatta aningaasaqarnerata ilorraap tungaanut aallarteqqinneqarnissaa Naalakkersuisunit isiginiarneqarnerusariaqartoq, aatsaallu taamaaliornermi Inatsisartuni partiinit tamanit isunmaqatigineqarsinnaanissartik angusinnaakutsooraat.

Naalakkersuisut siulittaasuata, Kuupik Kleistip, illuatungiliuttut siuttuat imaaliallaannaq akerlilerlugu oqanngilaq, oqarluni aalajangigassat amerlanerpaanit tapersersorneqarnissaat kissaatiginartoq, taamaattoqarnissaalu takorloorlugu Naalakkesuisut siulittaasuata oqaatigaa:

- Inuiaqatigiinni ingerlariaatsinik annertuunik allannguiniaraanni, tamannalu iluatsissappat taava tunuliaqutinik amerlanerpaanik tamassuma isumaqatigineqarnissaa pisariaqartarpoq, taamaattoqanngippat allannguiniarnerit iluatsinnissaat ilimanarneq ajorpoq. Taamaammat utaqqikatattoqarsinnaanera paasinaraluarluni, illuatungaani aamma tamat oqartussaaqataanerat ataqqineqartariaqarpoq. Allannguinissat annertuut marluk, tassalu Akileraartarnermut innersuussut aamma Angallanneq pillugu innersuussut maanna aatsaat Inatsisartuni oqaluuserineqarnissaat piareerput. Taakkulu oqallisigineqarneri tunngavigalugit aalajangiinissamik Naalakkersuisut siunnersuuteqassapput. Neriuutigaarpullu oqaluuserineqartussat aInatsisartuni amerlanerpaanit tapersersorneqarumaartut, Naalakkersuisut siulittaasuat, Kuupik Kleist oqarpoq.