Siumut aamma Inuit Ataqatigiit upalugaasimanissaq pillugu isumaqatigiipput

Nunatsinni ajunaarnersuaqartillugu upalugaarsimasussanik pilersitsisoqarnissaa siunnersuutigineqarpoq. Taakku immami nunamilu ajunaarneqartillugu ikiuussinnaassallutik.

Taama siunnersuuteqartut tassaapput, Inatsisartunut ilaasortat Doris Jakobsen, Siumut aamma Inuit Ataqatigiit sinnerlugit Inatsisartunut ilaasortat, Sara Olsvig aamma Naaja Nathanielsen.

Taakku tamarmiullutik siunnersuutigaat, ajunaarnersuaqartillugu ikiuussinnaasunik upalugaarsimasussanillu pilersitsiniarnermi, Danmarkimi naalakkersuisut suleqatigalugit tamanna qanoq piviusunngortinneqarsinnaanersoq.

- Eqqaaneqartarpoq Qallunaat Illersornissakkut suliaat Nunatsinni naammanngitsut. Siunnersuuterput assigiinngitsunik marlunnik tunngaveqartoq oqaatigineqarsinnaavoq siullermik, Nunatsinni innuttaasut upalugaarsimanissaq eqqarsaatigalugu akisussaaqataanerulernissaat anguniarlugu, aappaattut isumaqaratta upalugaarsimaneq ajunnginnerusumik aaqqissuunneqarnissaa anguniaralutigu, Sara Olsvig, Inuit Ataqatigiit taama oqarpoq.

Upalugaarsimasussanik pilersitsiniarnerup tunngavigilluinnagaasa ilagaat, Nunatta imartaani aammalumi nunataani angallanneq ukiuni kingullerni annertusiartuvinnassoq. Tamanna pillugu Doris Jakobsen, Siumut ima oqarpoq.

- Umiarsuit Nunatsinnut tikittartut amerligaluttuinnarput. Tamakkulu ajutuussagaluarpata ikiuuunnissatsinnut piareersimanerput killeqarpoq. Isumalluutituagut tassaapput napparsimmavinni annaassiniartartut, politiit qatserisartullu. Taakku kissiisa isumalluutigissallutigit naammanngillat.

Doris Jakobsenip aamma Sara Olsvigip Nunatta nunat eqqaaniittut misilittagaat paasisassarsiorfigisimavaat. Tamanna pillugu Doris Jakobsen ima oqarpoq.

- Danmarkimi Islandimilu upalugaarsimasussatut utoqqaat inuusuttullu allattugaatigineqarput taakku piareersimasussaallutik. Taakku suliassaraat soorlu nerisassiortussatut utoqqaanerusullu kissartuliortuussallutik. Qaqqanilu ajutoortoqarnerani inuit qaqqasiorsinnaasut piareersimasuutigineqarlutik.

Doris Jakobsen oqarpoq.

Nunatsinni ajunaarnersuaqassagaluarpat, upalugaarsimasunik piareersimasoqarnissaa Nunatta nammineerluni akisussaaffigissariaqaraa pingaartuusoq, Sara Olsvigip oqaatigaa.

- Nunatsinni innuttaaqataasut akisussaaqataanerulernissaat anguniagaraarput upalugaarsimanissamullu piareersimasut pitsaanerusumik atugassaqartinnissaat anguniagaralutigu, taakku Issittumi Sakkotooqarfimmut tapertaalluarnissaat anguniagaralutigu.

Sara Olsvigip ilanngullugu oqaatigaa Qallunaat naalakkersuisunit siunnersuut tapersersorneqartoq. Doris Jakobsenillumi Qallunaat Illersornissaq pillugu ministeriat, Nikolai Wammen tallimanngorpat ataatsimeeqatigissavaa siunnersuutini pillugu.

- Tassami Danmarkip sillimaniarnermut tunngassuteqartut suli akisussaaffigimmagit ataatsimeeqatiginissaa pisariaqarmat.

Inatsisartunut ilaasortaq, Doris Jakobsen taama oqarpoq.

Namminneq piumassutsiminnik upalugaarsimasussat illoqarfikkaarlutik nunaqarfikkaarlutillu piareersimasalernissaat siunertaasoq siunnersuuteqartut tamarmik oqaatigaat. Siunnersuut tamanna siullermeerneqarluni Inatsisartuni ullumi oqaluuserineqassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat