Siumup qinigassanngortitaa: Kuupiup ukiortaami oqaasii IAp akerlilerpai
IAp taarsiullugu misissorusuppaa kujataani illoqarfinni Qaqortumi, Narsami Nanortalimmilu ujaraaqqanik mittarfililiornissaq. Tamannali IAp Naalakkersuisullu siulittaasuata ukiortaami oqaasiinit allaaneruvoq.
Tassani Kuupik V. Kleist oqarpoq Nuummi aamma Qaqortumi mittarfiliornissat sallersaasut. Taamaammat Siumut sinnerlugu qineqqusaartup Marie Lyberth Mathiassenip soqutiginartippaa IAp siunnerfia suunersoq.
Taanna isumaqarpoq qineqqusaartut oqaasiisa kujataani aningaasarsiornikkut ineriartornissaq unikaallatsikkaa piumasaraalu Kuupik V. Kleistip arlaannik iliuuseqarnissaa.
- Qineqqusaartitavut taakku pingasut nuna tamakkerlugu ataatsimeersuarnermi aalajangiussamut innersuussipput taamalu sattannatik. Qularutissaanngilaq Qaqortumi mittarfiliornissaq taqqavani innuttaasunut pingaaruteqartorujussuusoq neriuppugullu kujataani angallannermut misissuinerit iluaqutaajumaartut, Kuupik V. Kleist KNR.gl-mut oqarpoq. Isertuutinngilaalu una apeqqut pillugu naalakkersuisooqatigiit akornanni isumaqatigiinngittoqartoq, tamannali qinersinerup kingorna oqaluusereqqinneqarumaartoq.