Siumup Atassutillu sipaarniuteqarnissamut akuerseqataasimanertik peqqissimissutigigaat

Kommuneqarfik Sermersuumi atuarfiit 10 mio. koruunit inulaarlugit sipaarniarfigineqarnissaat Siumumut Atassummullu naammaginartumik paasissutissiissutigineqarsimanngilaq.
Allattoq Niels Krogh Søndergaard, Simon Uldum
februaarip 18-at 2014 05:06

Partiit taakku marluk ataatsimoorlutik tusagassiorfinnut nalunaaruteqarlutik taama allapput. Nuummi angajoqqaat atuartitsisullu sipaarniartoqarnissaanut sapaatit-akunnerani uani akerliussutsimik takutitsiniarlutik nalunaaruteqareersullu taama qisuariaateqarput.

Partiit taakku marluk ilaasortaatitaat tuarfiit sipaarniarfigineqarnissaat pillugu siunnersuummut kommunalbestyrelsimi akuerseqataagamik kingunerisassaat pillugit naammaginartumik paasitinneqarsimanatik maanna oqaatigaat.

- Erseqqaarissumik sukumiisumillu paasissutissiisoqarsimanngitsoq, Siumup gruppiani siulittaasoq Martha Abelsen taama allappoq.
 
Siumup atassutillu ilaasortaatitaasa ilumut atuarfiit sipaarniarfigineqartariaqarnersut aamma nalornissutigisimavaat, isertitassanik allanik nassaartoqareersimagaluarmat.

- Siumummi gruppianit akuersaarneqanngilaq ilaatigut Namminersorlutik Oqartussat kommunit allat aningaasaqarnikkut ajornartorsiortut ikiorniarlugit 20 mill. koruuninik kommunip tigusiffigineqarnera atuarfeqarnerup iluani sipaaruteqartariaqalernermik peqqutaasut ilagigaat, Siumup gruppiani siulittaasoq Martha Abelsen taama allappoq.
 
Abelsen nassuiaavoq, tamanni kommunalbestyrelsip akuersineratigut akileraarutip procentimik ataatsimik qaffaavigineqarneratigut matussuserneqareertoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq