Siumup ataatsimeersuarnerani arfininngorneq takisooq: Marlunnik atuuffeqarsinnaatitaaneq atulerseqqinniaraat
Siumup nuna tamakkerlugu ataatsimeersuarnera ingerlallualeruttorpoq. Siumummi Nuummi Hotel Hans Egedemi ataatsimeersuarnera arfininngornermi ullaakkut nalunaaqutaq 8.30 aallartippoq, sinniisut 65-it missaanniittut eqimattakkaartillugit partiip anguniagai immikkoortortaqarfinniillu assigiinngitsunit siunnersuutissat oqallisigineqartipput.
Siumup ataatsimeersuarnissaa
- Siumut tallimanngorpat ataatsimeersualissaaq. Partiimeersut 70-it missaat Nuummi peqataassapput.
- Ataatsimeersuarnermi oqaluuserisassat naatsumik:
- Tallimanngorneq: Ataatsimeersuarneq workshoppernertalimmik ammarneqassaaq.
- Arfininngorneq: Partiip anguniagai pillugit oqallinneq.
- Sapaat: Oqalinneq, naatsorsuutinik saqqummiineq, siulittaasumik siulersuisunillu qinersineq.
- Ataatsimeersuarneq knr.gl-imi KNR2-kkullu toqqaannartumik sapaatiuppat ullukkut nalunaaqutaq ataatsimiit aallakaatinneqassaaq.
- Siulittaasumik qinersineq nunatsinni politikkikkut aqutsinermut pingaaruteqaqimmat, minnerunngitsumillu kina Naalakkersuisunut siulittaasuussanersoq ersertussaammat - ataatsimeersuarneq toqqaannartumik aallakaatinneqassaaq
Tusagassiortut eqimattakkaarluni ataatsimiinnernut malinnaatinneqanngillat.
Eqimattat 15-iusut siunnersuutinik sorlernik tapersiinerlutik tapersiinnginnerlutillu nalunaaqutaq ualimut pingasunut saqqummeeqquneqarput.
Siumup siulersuisuunerisa marloqiusamik atuuffeqarsinnaanermut tungasoq siunnersuutigaat. Partiip marlunnik atuuffeqarsinnaanermut periarfissaq atuutilerseqqikkusuppaa.
Tassa imaappoq, assersuutigalugu kommunalbestyrelsimi ilaasortaanerup saniatigut Inatsisartuni aamma ilaasortaasoqarsinnaalluni. Tamanna takkuttunit akuerineqarpoq, siunnersuullu 45-nit akuerineqarluni.
Immikkoortoq partiip anguniagaanut tunngasoq nalunaaqutaq arfininngortoq suli tikinneqanngilaq.
Eqimattat partiip anguniagaanik oqallisiginninnissamut nalunaaqutaq arfineq-marlunut uteqqittussaapput.
Sapaammi ataatsimiinnissaq ullaakkut nalunaaqutaq 8.30 aallartissaaq, ullup-qeqqasiornissallu tungaanut oqallittoqassalluni. Nalunaaqutaq ataatsimut siulittaasussamik siulersuisussanillu taasisoqassaaq.
