Siumup arnat angutillu siulersuisuini naligiissitaanissaannik siunnersuut ullumi saqqummiutissavaa

Arnat angutillu naligiissinneqarnerunissaannik inatsisissatut siunnersuut ullumi suliarineqassaaq.

Pisortat namminersortullu siulersuisuini arnat angutillu naligiissitaanissaat - ukiuni arlalinni oqallisaasarsimaqisoq - inatsisikkut eqqunneqassaaq, siunnersuut akuerineqassappat.

- Matumani siunnersuutip ullumi saqqummiunneqarnissaa pitsaalluinnartutut isigaara. Neriuppunga akuerineqassasoq. Naligiissitaanermut tunngatillugu pitsaasuuvoq, aammalu immikkoortitaanissamut naligiinnerulertoqarneranik pilersitsissaaq, Naligiissitaanermut Siunnersuisooqatigiit siulittaasuattut toqqagaaqqammersoq Ulrikka Holm oqarpoq.

Ilinniartitaanermut, ilageeqarnermut, kultureqarnermut naligiissitaanermullu naalakkersuisup Nick Nielsenip inatsisissatut siunnersuut allanngortitsingaatsiartussaq Inatsisartuni ullumi saqqummiutissavaa.

Siunnersuut akuerineqassappat piffissap sivikitsup iluani Kalaallit Nunaanni siulersuisut arnanik angutinillu amerlaqatigiinnik ilaasortallit pigineqalissapput. Inatsisissatut siunnersuummi ima allaqqavoq:

- Arnaaneq angutaanerluunniit apeqqutaatinnagu inuussutissarsiornermut peqataasoqarsinnaanissaa qulakkiissavarput.

Naligiissitaanermut Siunnersuisooqatigiit siulittaasuat isumaqarpoq siulersuisut angutaanerusunik ilaasortaqaleraangata kaffisorujooqatigiinnissamut saaqqajaasoqalersartoq.

Suliffeqarfiilli angutaannangajannit ingerlanneqartut, soorlu assersuutigalugu Royal Greenlanditut ittut, siulersuisunut ilaasortat affaasa arnaanissaannik pinngitsaalineqarsinnaanissaat piviusorsiorpa?

- Arnanik aqutsisussatut siulersuisunullu ilaasortassatut piukkunnartunik nassaarniarnissarput ajornartorsiutaasussatut isumaqanngilanga. Taakkumi pigereerpagut, Ulrikka Holm oqarpoq. Siumup inatsisissatut siunnersuutaa pitsaasumik nassataqassaaq, Naligiissitaanermut Siunnersuisooqatigiit siulittaasuat Ulrikka Holm nassuiaavoq.

Nick Nielsenip inatsisissatut siunnersuutaa Naligiissitaanermut Siunnersuisooqatigiit suleqatigalugit suliaavoq, namminersortullu pisortallu suliffeqarfiutaanni siulersuisuni arnat angutillu naligiissitaanissaasa saniatigut uumisaarisarnerup pinaasersumullu qaninniartarnerit inerteqqutaalernissaat aamma eqqunniarneqarpoq.