Sten Lund Siumumi assortuunneq tamat oqartussaaqataanerannut innarliisinnaasoq
- Demokratii innarlerneqartutut tassani aamma nalilerneqarsinnaavoq, Sten Lund taama oqarpoq.
Kim Kielsen Lars-Emil Johansenilu assortuutsillutik oqaaseqaraangamik atuuffimminnut atatillugu oqaaseqarnersut imaluunniit partiiminni inissisimanertik pitsaanerulersinniarlugu oqaaseqarnersut nalornissutigineqalersinnaasoq, politikkikkut malinnaasoq isumaqarpoq.
- Qinersisartuulluni paatsiveerusimaarneq toqqissisimananngimmat.
Politikerillu sulinerat assortuunnermit akornuserneqarsinnaasoq, Sten Lundip oqaatigaa.
Assortuunnerlu ilungersunartoq, Naalakkersuisut siulittaasuata, Kim Kielsenip, oqaatigaa.
- Soorunami saqitsaannermi nukippassuit atorneqartarput. Innuttaasunik kiffartuussinermi atugassarigaluagut, Kim Kielsen oqarpoq, ilanngullugulu oqarluni, partiimi aaqqiagiinnginneq tatiginassutsimut innarliisoq.
Politikkikkullu suliat aallunneqarsinnaaniassammata assortuunneq partiip julimi ataatsimeersuarneranut kinguartikkusukkaluarpaa.
Siumumili ilaasortat assigiinngitsorujussuarnik isumaqarmata, partiip politikkikkut anguniagai oqaluuserineqarsinnaasariaqartut, Lars-Emil Johansen KNR-imut oqarpoq.
Ammasumilli assortuunneq innuttaasunut nalornisitsisinnaasoq, Sten Lund tassa isumaqarpoq.
Innuttaasullu kina assortuunnerup kingorna inissisimalluarnerussanersoq aalajangissavaat.
- Kina arlaatigut tatigineqarnerunersoq, kingorna aamma taanna malunnarsiumaarpoq, qularnanngitsumik qinersisoqalernerani. Kikkut inuiaqatigiit akornanni arlaatigut tapersersorneqarnerunersut, politikkikkut malinnaasoq, Sten Lund Qanoruumut taama oqarpoq.