Siumukkut Atassutikkullu tupaallatsitsipput
Aningaasat amigartoorutissatut aappaagumut siunniunneqarsimagaluartut affaannanngortinneqarneri, Aningaasaqarnermut Naalakkersuisup, Vittus Qujaukitsup qangali oqaatigeriigaa, Siumukkut aningaasaqarnermut oqaaseqartartuata, Finn Karlsenip nuannaarutigalugu siullermik oqaatigaa. Kinguninnguali tupaallatsitsivissorluni oqaatigaa, Grønlands Bankimut piginneqataassutit tuniniarneqarnissaannut Siumukkormiut tapersersuinngitsut.
Finn Karlsenip taama ullumi oqarnera, siusinnerusukkut oqaatigeriigaanut naapertuutinngillat, tassami Finn Karlsenip Grønlands Banken-imut piginneqataassutit tuniniarneqarnissaannut isumaqataalluni oqarnikuugami.
Finn Karlsenip oqaluttarfikkut ullumi oqalugiarnermini oqaatigaa, aningaaseriveqarnikkut piginneqataassutit tuniniarneqarnissaat maannakkuugallartoq kissaatigineqanngitsoq, tamanna nassataqassammat aningaasat aappaagumut isertissamaakkat 68,5 million koruunit, ukiup tulliani 62,5 million koruuninik ajorseriartussaassammata. Taamaattumik piginneqataassutinik isaatitsineq ullumikkut atuuttoq piumanerullugu oqaatigalugu.
Inuit Ataqatigiit oqaaseqartartuata, Naaja Nathanielsenip Siumukkut aperai, qanoq iliornikkut Siumukkut amigartoorutissat annikillisimanerinut akuersaareerlutillu aningaaserivimmit piginneqataassutinik tuniniaannginnissaq isumaqataaffigisinnaaneraat, aningaasallu suminngaanniit aaneqarnissanersut aperaluni.
Apeqqummut tamassumunnga Finn Karlsen akivoq, aalisakkat Nunatsinni takussaasimanngikkaluartut takussaalerneranni tamakku aalisarneqarnerisigut taakkulu akitsuuserneqarnerisut aningaasat aaneqarsinnaalluarmata.
Aningaasanut tunngasunut Atassutip oqaaseqartartua, Gerhardt Petersen aamma tupaallatsitsivoq, taassuma siunnersuutigimmagu Nuna tamakkerlugu akileraarut 1 procentimik qaffanneqartariaqartoq. Taama siunnersuuteqarpoq naak oqalugiarnini aallarnerlugu oqaraluarluni:
- Torrak Kalaallit Nunaata aningaasatigut ataqatigiissumik siunnerfilimmillu aqunneqarnissaanut sakkussagut aatsaat taama pitsaatigaat.
Gerhardt Petersen tamatuma kingorna oqarpoq, aatsitassarsiornikkut suliniutit aallartisarneqarneri aningaasarpassuit isaalersussaasut eqqaamaqqullugu.
Inuit Ataqatigiit aningaasaqarnermut oqaaseqartartuata, Naaja Nathanielsenip aningaasanut inatsisissaq siuariartortoq naqissuseriarlugu apeqquserpaa, siunissaq ungasinnerusoq isigalugu isummersortoqannginnera. Amigartoorutit matussuserniaannarlugit isaasalerlugu "ilaqutariit pigisaannik" tuniniaasoqalernera taarsigassarsiniartoqarneralu Naaja Nathanielsenip uggoraa.
Naalakkersuisoqatigiit teknikkikkut suleqatigilerneranni, taakku qanoq iliuusaannut ingerlaannartumik paasinnittutut isigineqassannginnertik, Demokraatit siulittaasuata, Jens B. Fredriksenip naqissuserpaa. Tamatumalu kingorna oqarluni, ukiuni tulliuttuni marlunni amigartooruteqariarlutik tamassuma kingorna ukiuni marlunni tulliuttuni sinneqartoornissamik Siumukkut oqalunnerat paasisinnaanagu.
Jens B. Fredriksenip naggasiilluni oqaatigaa, eqqaamallugu 2006-mi Siumukkut Naalakkersuisuullutik maanna pissusertik taama aamma atormassuk oqaluni 2010-mi Nunatta karsiata amigartooruteqarujussuarneranik tamanna kinguneqarmat.
