Siumukkormiutoqaq: Siumup kinguariarnera tupannarpoq

2005-imi qinersisoqarmat Siumut inatsisartunut qulinik isertitaqarpoq, Inuit Ataqatigiit arfineq-marlunnik isertitaqartut.

Marlunngormat qinersinermi Inuit Ataqatigiit partiini tamani annersanngorput 14-inik isertitaqarlutik, Siumut qulingiluanik isertitaqartoq.

Partii Siumut illuatungiliuttunngoriaannanngorpoq, taamaattoqassappallu Edvard Møllerip neriuutigaa Siumukkormiut politikkertik ersarissumik ingerlakkumaaraat.

- Taamannak annertutigisumik kinguariarneq assut tupannarpoq. Kisianni malunnarpoq qineqqusaarnerup naammassiliivinnerani assut saqqummiussukkat assigiinngitsut akerleriissutigineqarlutillu ilaatigut ajoraluartumik akerartuunermik sangutinneqaqattaartut. Isumaqarpunga assigiinngitsorpassuarnik sunniuteqartumik taamannarujussuaq Siumut kinguariartoq.

Siumut perngaamik illuatungiliuttunngussagaluarpat tamanna ajunngitsumik ingerlasasoq, Edvard Møllerip neriuutigaa.

- Neriuutigilluinnarpara erseqqissumik ajunngitsumillu politikki ingerlatissagaat. Tamanna inuiaqatigiit iluaqutigissagaat qularnanngilaq.

- Qinersititsinissaq sioqqutitsiarlugu saqqummiussuuneqartut assigiinngitsorpassuupput. Meeqqat, inuiaqatigiillu iluanni ajornartorsiutit imaannaanngitsut. Pisuutitsinerit tassaasinnaapput immaqa paasinerluinermilluunniit tunngaveqartut, qinersisartut tungaaninngaaniit taamatut sangorujussuartitsisoqartoq, Edvard Møller naggasiivoq.

Edvard Møller KANUKOKA-mi siulittaasutut 2001-imi tunuarpoq.