Siumup nuna tamakkerlugu ataatsimeersuarnissaa qallilluinnarpoq, partiimilu eqqartugaajuartoq uranitalimmik aatsitassarsiornissaq siulittaasunngorniuttut isumaqatigiissutiginngilaat.

Siulittaasunngorniuttunit marluk uloriananngippat uranimik piiaanissaq isumaqatigaat. 

Kim Kielsen KNR-imut ima qanittukkut oqarpoq:

- Peqqissutsimut tunngasut inuiaqatigiinnut avatangiisinullu sunniutissai allallu eqqarsaatigalugit ilisimatuussutsikkut piiarneqarsinnaasutut nalilerneqarpata, taava aatsitassatut allatulli piiarneqarniarlik (urani, aaqq.).

Aki-Matilda Høegh-Dam KNR-imut ima qanittukkut oqarpoq:

- Ajornartorsiortitsinngiivippat sillimappallu naaggaassaagut? Taamaattoqarnavianngilaq. Angerniaannavilluta eqqarsarianngivilluta iluamilluunniit qulakkeersinnaanngikkutsigu aamma inuiaqatitsinnut iluaqutaassanngitsoq ilumut pinngortitamut sequtserissanngitsoq taava itigartitsineq naaggaarniaannarluni aamma pissusissamisuunngilaq.

Immikkoortortaqarfinniit sisamanit, KNR-ip oqaloqatigiasaanit, takkununnga isumaqataapput.

Uranitalimmillu piiaalertinnani inunnut pinngortitamullu ulorianannginnissaa qulakkeeqqaarneqartariaqartoq taakkua tikkuarpaat.

Siumut Narsaq:

Siumut Narsami siulittaasoq Josef Petersen isumaqarpoq Kuannersuarni aatsitassanik piiaaneq inunnut pinngortitamullu akornusiinngippat aallartinneqarsinnaasoq. Aatsitassallu nunani allani immikkoortitserivinnut ingerlateqqinneqartarsinnaanerata periarfissaasinnaanera eqqartorneqarpallaanngissoraa.

- Oqaatigiuaannarpara pinngortitamut inunnullu annertuumik innarliinngippat, pissutissaqanngilanga uninngatitsissallunga, Pisariaqarteqaavut inuit sulilerseqqqinnissaat, taamaattumik taanna alloriarfigisariaqartutut isumaqarfigiuaannarpara.

Privatfoto: Josef Petersen

Siumut Qaqortoq:

Siumut Qaqortumi siulittaasoq Karlina Lundblad isumaqarpoq Kuannersuarni inunnut pinngortitamullu akornutaanngitsumik aatsitassarsiortoqarsinnaappat, aatsitassarsiorneq aallartissinnaasoq.

- Kuannersuarni uranimik piiaasoqarnissaanut atatillugu isumaqarpunga massakkorpiaq taakkua piiaasussat pilersaarutaat assut nalunartoqalaartoq, imaakkami eqqagassat taakkua tatsimut sapusiarsualerlugit eqqarniaraat qulakkeerneqanngilaq iluamik qanoq ajoqutaasinnaatiginerat

Privatfoto: Karlina Lundblad

Siumut Tasiilaq:

Siumut Tasiilami siulittaasoq Aron Jonathansen uranitalimmik aatsitassarsiorsinnaaneq suliffissanik pilersitsisinnaappat tikilluaqquaa, uranisiornissarli pillugu inuiaqatigiit taasitinneqassasut isumaqarluni.

- Taanna aatsitassanik piaasinnaanermut suliaqarsinnaaneq angerparput, kisianni uranimut tunngasortaa annertunerusumik eqqartornikuunngilarput. Soorunami Kalaallit tamaqqissaatta aalajangiiffigisussaavarput taanna urani.

Privatfoto: Aron Jonathansen

Borgmesterini Siumumeersutuaasoq Malik Berthelsen inunnut pinngortitamullu mingutsitsinnginnissaq qulakkeerneqarsinnaappat uranitalimmik aatsitassarsiortoqalersinnaasoq isumaqarpoq.

- Soorunami tamatta soqutigisarivarput uumasut pinngortitallu mingutsinneqannginnissaat, aamma tamanna inatsimmi piumasaqaataavoq. Kisianni taamaakkaluartoq uanga isumaqarpunga mingutsitsisinnaasutut aarleqqutigineqartoq nunatta avataani suliarineqarsinnaanersoq misissorneqartariaqartoq. Tassami tamatta nalunngilarput nunarput amerlanerusunik aningaasanik isertitaqarnissaminik pisariaqartitsisoq.

Erik Jensennip Naalakkersuisoqatigiinnerup ataqqineqarnissaa inatsisartunilu amerlanerussutillit aallajangereeraat ataqqillugu oqarpoq.

- Kuannersuarni aatsitassarsiortoqassanngitsoq innuttaasut Inatsisartunut kingullermik qinersinermi ersarissumik kissaatigaat. Tamanna Siumumi tusaatissatut tiguarput. Suliniut unitsinneqassasoq Inatsisartut amerlanerussuteqartut aalajangereerpaat. Naalakkersuisoqatigiinniikkattalu ataqqissavarput.