Siulittaasup oqalugiaataa amigaateqartippaat
Naallu nalunaarut ataatsimeersuarnermi peqataasunit tamakkiisumik tapersersorneqarlunilu nersorneqaraluartoq, Nunatta ineriartortinneqarnissaanut atatillugu takorluukkanik ataatsimut isigalugu amigaateqartoq, peqataasut arlallit oqaatigaat.
Siumup partiitut pilersinneqarneranit angusimasai, Aleqa Hammondip kingumut qiviarluni eqqaavai, Pingajoqqallu, tassa Lars Emil Johansenip, Moses Olsenip Jonathan Motzfeldtillu qunusuillutik sapiissuseqarlutillu Namminersornerunerup eqqunneqarnissaanik sulisimanerat aamma eqqaallugu.
- Aperisassaqaratik, issuagassaqaratik, siunnersornissaqaratik, allanit ikiornissaqaratik kisiannili nammineq illernit siulliit ingerlaffigineqanngitsikkut pilersippaat – aatsaallimi qaallorimmik illinersiorata, Aleqa Hammond ilaatigut oqarpoq.
Maannamut angusat pitsaasut, Aleqa Hammondip oqalugiaammini sammivai. Siumup kingullermik ataatsimeersuarnermi anguniagassatut siunniussai, tassa ilinniartitaanerup qaffassarneqarnissaata anguneqarsimanera, Aleqa Hammondip assersuutigaa.
- Timmisartorsuarmik Atlantikoq qulaallugu timmisartortillunga timmisartorsuup naalagai kalaallisut tikilluaqqusisarput. Inatsisilerituunik pisariaqartitsiguma nammineq toqqarsinnaavara kalaallisut oqaluttuussanersoq, kalaalerpassuit ilinniartitsisut, inatsisilerituut, nakorsat, pisortallu imaaginnalernikuupput, Aleqa Hammond ilaatigut oqarpoq, ilinniarnerminnillu naammassinnittartut amerliartuinnarnerat assersuutigalugu. Ilinniarnerminnilli unitsitsiinnartartut suli amerlanerat iserfiginagu.
Inatsisartullu siulittaasuat Lars Emil Johansen Aleqa Hammondip oqalugiaataanut oqaaseqarami oqalugiaammi maqaasisaqarpoq:
- Siulittaasup nalunaarutaa siunissaq pillugu takorluukkanik amigaateqarpoq. Partiimilu ilaasortat siulittaasumut siulersuisunullu anngaaginnartutut inissisimalersimapput, Lars Emil Johansen oqarpoq.
Ilinnialerneq ajortut, taamalu suliffissaaleqilersinnaasut pillugu Aleqa Hammondip taasaqannginnera, Kommune Kujalliup borgmesteriata Jørgen Wæver Johansenip ippigaa.
Persuttaasarnerup, atornerluinerup, kinguaassiuutitigullu atornerluisarnerup iliuuseqarfigineqarnissaat pillugu takorluukkanik, Kim Kielsen maqaasisaqarpoq.
Ilinniartitaanermut Naalakkersuisup Nick Nielsenip oqariartuutaa aamma ersarippoq:
- Uagutsinnik suleqatiginnissinnaassutsit maqaasivara, siunissarlu pillugu takorluukkanik maqaasisaqarpunga, Nick Nielsen oqalugiarnermini ilaatigut oqarpoq, Nunattalu assersuutigalugu 2030-mi namminiilivissinnaaneranik takorluukkersaarutit maqaasillugit.
