Siulittaasoq: Royal Greenlandip tusaamasaanera suli pitsaanerulissaaq

Nunatsinni suliffeqarfiit annersaata siulersuisuini siulittasunngorlaaq, Niels de Coninck-Smith oqarpoq.

- Uanga periarfissinneqarsimanera uanga nammineerlunga perruualaarutigeqalugulu suliassamut piukkoqaanga, Niels de Coninck-Smith oqarpoq.

Royal Greenlandip atukkiisuisa aningaasaatitik aasaq tigorusuleqimmatigit, Naalakkersuisut suliffeqarfissuarmut milliardit koruunit affaannik aningaasaliipput. Aningaasat affaat Nunatsinni suliffeqarfissuit annersaata piginitsiminut utertittusaavai.

Aammami siulersuisunut siulittasunngortup piginnittut tapersersuinerat nuannaarutigeqaa.

- Piginnittut taamaaliornerat suliffeqarfimmut pingaaruteqaqaaq. Kisianni soorunami aamma pisussaaffiliivoq, tassami tapersersorneqarnissaq pissusissamisoortoq, Royal Greenlandip maanna takutittariaqarpaa, siulittaasunngortoq oqarpoq.

Kisianni akiitsut taarsersornissaat eqqarsaatigissanngikkaanni, Royal Greenlandimut piffissaq aggersoq pissanganartuusoq, siulittaasup unnerpaa.

- Royal Greenlandip tunisassiai torraalluinnartumik isigineqarput. Kalaallit Nunaanni tunisassiarineqartut, nunani tamalaani piumaneqaqaat, suliffeqarfimmullu isertitsilluaataasarlutik. Tassa suliffeqarfissuaq pitsaalluinnartumik isigineqarpoq, allaallu oqarusuppunga, taama isigineqarneq allanit sinngagineqartoq. Taamaanneralu suli pitsaanerulersinneqartariqarpoq, Niels de Coninck-Smith oqarpoq.

Tassalu Royal Greenlandip ilisarnaataata sapinngisaq tamaat pissarsissutaanissaa, siulersuisuni siulittaasup suliassat siullersaattut isigaa.

Suliassat tullissaattut isigisaa tassaavoq, suliffeqarfissuup ukiunut tulliuttunut tallimanut pilersaarusiaa piviusunngortissallugu. Pilersaarut taanna tunngaviuvoq, Namminersorlutik Oqartussat Royal Greenlandimut aningaasaliinerannut.

Niels de Coninck-Smith 54-inik ukioqarpoq, Danmarkimilu inuussutissarsiutinik ingerlatsinermik misilittagaqarluarluni.

Nakorsaasiorfimmi Ferrosanimi pisortaanerusimavoq, siunnersuisartoqatigiinni McKinsey og Co-mi piginneqataasimalluni, suliffeqarfiillu assigiinngitsut siulersuisuini maanna ilaasortaalluni. Kisianni Royal Greenlandip siulersuisuini siulittaasunngornermigut nunatsinni inuussutissarsiutini unammilligassanik aatsaat misilittaqalerpoq.

- Uunga suliassamut inuk, qanganisarsiortoq suliamullu pikkorissuunissamik pingaartitsisoq, Kalaallit Nunaanni pereersimasunut akuunngitsoq, qinerneqarsimasoq oqarsinnaavutit, Royal Greenlandip siulersuisuini siulittaasoq, Niels de Coninck-Smith, oqarpoq.