Siulersuisut imminnut ajunngitsorsiassalersorsuaartut
Aningaasaateqarfiup ingerlannera siorna 2,7 millionit koruuneqarsimavoq.
Ingerlatsinermi immikkuualuttut amerlanersaat aningaasartuutaanerulersimapput, siulersuisuni ilaasortat aamma ajunngitsumik pineqarsimapput. Taakkua ajunngitsorsiaannut katillugit ukiumut 300.000 koruunit atorneqartarput.
Taakkua saniatigut angalanernut akunnittarfinnullu, ilaasortat ullormusiassaannut, ataatsimiinnermi aningaasartuutinut aningaasartuutinullu allanut atuisoqartarpoq. Tamakkununnga siulersuisullu ajunngitsorsiassaannut 687.000 koruunit siorna atorneqarput. Ukiummi siulianit ikinnerugaluarput, tamakkununnga 813.000 koruunit atorneqarmata.
Aningaasaateqarfiup siulittaasua, Per Berthelsen, matumunnga tunngasumik oqaaseqarumanngilaq, innersuussutigaluguli ajunngitsorsiat maanna amerlassusiligaanerat, aningaasaqarnikkut nunarsuarmi ajornartooqqanerup siornatigut amerlassusilinermut uteqqinnerusoq.
Aammami ilumoorpoq, 2008-mi ajunngitsorsiassanut 267.000 koruunit atorneqarmata, ukiorli taanna kisimi taana ajunngitsorsiassaqartitsisoqarpoq, taamalu ajunngitsorsiassiisarnerullu naliginnaasumik qaffasissusianik ersersitsisuunani.
Siulersuisunummi ukiup siuliani 150.000 koruunit ajunngitsorsiassiissutigineqarput, ukiumilli ataatsimik uteqqikkutta taakkununnga atukkat suli ikinnerupput. Taamaammat oqaatigisariaqarpoq, aningaasaqarnikkut nunarsuarmi ajornartoornerup siornani ajunngitsorsiat amerlassusiannut uteqqermik oqarneq tulluanngimmat.
Tassami taama amerlassusiliineq ukioq ataasiinnaq atuussimavoq.
Ukiup tulliani 2009-mi siulersuisuusut ajunngitsorsiassatik 135.000 koruuninut apparpaat, aningaasaqarnikkut nunarsuarmi ajornartooqqaneq pissutigalugu, aningaasaateqarfimmi taamani isertitaqanngiusarpoq. Kisianni ajunngitsorsiat 2010 qaffaallanneqarput 147.000 koruuninngortillugit.
Nunafondimili aappaagukkut aningaasaqarnermik ajornartooqqanermik malunnartoqanngilaq. Tassami siornaammat ajunngitsorsiakinnertik innersuussutigalugu, taakkua 135.000 koruuninik ilavaat, tassalu 2010-mi ajunngitsorsiat taamaalillutik katillutik 282.000 koruuniuleriataarput.
Ukioq taanna aamma qaffaasoqarpoq, ajunngitsorsiat ukiumut maanna amerlassusiat 300.000 koruunit aalajangerneqarlutik.
Ajunnngitsorsiat qaffapiloorsimanersui eqqumiigissagaanni, taava siulittaasup tikkuarpaa, aningaasaateqarfimmi maanna suliassat siornatigornit amerlaneroqisut.
Aamma nassuiaatigineqarsinnaavoq, aningaasaateqarfimmi pisinnaatitsissummi allassimasoq, tassalu siulersuisut ajunngitsorsiassatik namminneq amerlassusilersinnaagaat, suliat amerlassusiat qanoq ittuussusiallu taavalu ataatsimiinnerit amerlasusii nalileriarlugit.
Radioaviisip siulersuisuni siulittasuusimasoq, IA-meersoq Juliane Henningsen, apersorusussimagaluarpaa. Taannami aningaasaateqarfimmi aningaasartuutit qaffattaqattaarnerannut akisussaasuuvoq. Taannali sianerfigigatsinni apersorneqarumanngilaq, apeqqutissagulli siumoortumik takoqqaarumallugit. Radioaviisimit akunnattuungasunnguamik taamaaliorpugut, taavalu isumaqatigiippugut pingasunngornermi ualikkut naapissasugut. Kisianni Juliane Henninngsenimit ullup qeqanngitsiartoq mailisivugut, apersorneqarumanani nalunaartumik.
