Siulersuisuni ilaasortat ikilisarneqarput

Siulersuisut pikkorinnerulernissaat aamma aningasanik sipaarnissaat siunertarineqartoq, Naalakkersuisut siulittaasuat Kuupik Kleist oqarpoq.

Partiit ataasiakkaat toqqagaannik siulersuisunut ilaasortaatitaqartarneq atorunnaarsillugu arnanik amerlanerrnik aamma inuusuttunik piukkunnartunik ilaasortaqalernissaq siunniunneqarpoq:

- Naalakkersuinikkut soqutigisat toqqammavigalugit suliffeqarfissuarnik ingerlatsineq pigaarnerunngilaq, pingaarneruvoq inuiaqatigiinni aningaasarsiornikkut iluaqutaanissaat, naalakkersuisut siulittaasuat Kuupik Kleist oqarpoq.

Namminersorlutik Oqartussat pigisaanni suliffeqarfissuarni arlalinni siulersuisut allanngorlugit aaqqissuunneqarput, soorlu Greenland Developmentimi siulersuisunut ilaasortat arfineq-marlunniit sisamaannanngortinneqarput, Greenland Venturemi ilaasortat tallimaniit pingasuinnanngortinneqarlutik aamma Tele Greenlandimi quliniit arfiniliinnanngortinneqarlutik.

Taamaaliortoqarpoq angalanernut akissarsianullu aningaasanik sipaarnissaq siunertarineqarluni. Aamma pikkorinnerusumik ingerlatsilernissaq siunertarineqartoq, Kuupik Kleist oqarpoq:

- Politikkikkut qinikkat tassaassapput kommunalbestyrelseni, nunaqarfinni aqutsisuni aamma Inatsisartuni ilaasortat. Kisianni suliffeqarfinni siulersuisut tassaassapput sulianut pikkoriffeqarlutik ilisimasaqarlutillu sulisussat, Kuupik Kleist oqarpoq.

Suliffeqarfissuaq ataaseq kisimi siulersuisuunerni ilaasortanik allanngortitsinngilaq, tassalu Royal Greenland.