Siuariartoqarlunilu kinguariartoqarpoq
Qaqortumi nalunaaqutaq tallimanut 1316-it qinersisimapput, taakkualu qinersisinnaasut 56,10 procenteraat.
2013-imi 1515-it qinersereerfiannut naleqqiullugu, tamanna 3,92 procentpointinik kinguariarneruvoq.
- Qaqortumi silagittorujussuugaluarpoq seqinnarilluni, kisianni nillataarluni. Kisianni qinersiartortut ikeriaramik. Naluarput suna peqqutaanersoq, Kommune Kujallermi qinersivinni akisussaasoq, Kim Dahl, oqarpoq.
Erseqqissarpaali qinersinissaq suli periarfissaasoq, qinersiviillu aatsaat arfineq pingasunut matussasut:
- Inuit ullup sinnera aggialluarumaartut neriuutigivarput. 2013-imut naleqqiullugu qinersiartortut amerlanerit sapinngisamik qinersinissaat kissaatiginaqimmat.
Qinersisut 55-inik amerleriartut
Sisimiunili siuariarneqalaarpoq. Nalunaaqutaq sisamanut inuit 1388-it qinersereersimapput, tassa illoqarfiit annersaasa tulliani qinersisinnaasut 35,25 procentii qinersivimmeereersimallutik. Tassalu siornaak 2013-imut naleqqiullugu 2 procentinik amerlanerit.
- Soorunami neriuutigivara 2013-minngaanniit, 56,3 procentiusoq qaangissagipput. Neriuuutigisorujussuuara 60 procenti angusinnaassagipput Taamaattumik qinersisartut qinersiartornissaat kissaatigivara, Sisimiut qinersivimmi akisussaasoq, Hans Christian Sværd, oqarpoq.
