Sisimiuni ukioq manna sangusaarnermi, Nuummi Snowboardimik Aasiannilu ujakkaarnermi pissartanngorniuttoqarnissaanut pilersaaruteqartoqaraluarpoq. Pissartanngorniunnissat tamarmik corona pillugu malittarisassat pissutigalugit ukioq manna taamaatiinnarneqarput.Assi: Jette Brandt

Sisorartartut assammik arsartartullu kattuffiisa nunatsinni aappaagu pissartanngorniunnissaq suli neriuutigaat

Assammik arsaattartut, isikkammik arsartartut sisorartartullu kattuffiisa nunatsinni aappaagu pissartanngorniuttoqarsinnaanissaa suli neriuutigaat.

Corona nunatsinnilu pissartanngorniunnerit imminnut tulluariinngillat. Nunatsinni ukioq maanna pissartanngorniunnissaagaluit tamangajammik corona pillugu killisuinerit pissutigalugit taamaatiinnarneqarput.

Tamannalu aappaagumut allanngungaartussaarpasinngilaq. Corona pillugu killilersuinerit aappaagu januaari ilanngullugu atuuttussaapput, taamaalilluni aaqqissuussinernut pisussanullu, nalunaarluni peqataaffigineqartussanut kommunimit kommunimut angalalluni angalaqqusaasoqanngilaq.

Kalaallit Nunaanni Timersortartut Kattuffiata siulittaasuata, Nuka Kleemannip oqarnera naapertorlugu killilersuinerit allanngortinneqarallartussaarpasinngillat. Taassumali politikerit timersornerup silarsuaanut immikkut maanna ukkatarinninnissaat neriuutigaa.

Akiuussutissaq nunatsinni pissartanngorniuttoqarsinnaatitsissasoq

Timersoqatigiiffiit Assammik Arsartartut Kattuffiali (TAAK) neriuuteqaannarpoq.

Kattuffiup siulittaasuata, Jørgen Isak Olsenip covid-19-imut akiuussutissiorneq qanimut malinnaaffigaa. Akiuussutissaq aappaagu pissartanngorniuttoqarsinnaanissaanut neriuutissaqartitsisoq taanna isumaqarpoq.

Katersuunnissamut malittarisassat

Inuit amerlanerpaamik 100-it januarip ulluisa 31-ata tungaanut illup iluani katersuussinnaapput. Silami inuit amerlanerpaamik 250-it katersuussinnaapput.

Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:

"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."

- Naak killilersuisoqaraluartoq neriuutigaara pissartanngorniuttoqarsinnaassasoq. Akiuussutissiornermut atatillugu ineriartortoqarpasippoq, tamannalu tunngavigalugu aappaagumut neriuuteqarpunga, TAAK-ip siulittaasua oqarpoq.

AAMMA ATUARUK GIF: 2021-mi GM-ertoqarsinnaanera qularnartoqarpoq

- Nunatsinni tunillaassuuttoqanngikkuni akiuussutissarlu periarfissaaleruni taava politikerit killilersuinernik nalileeqqittariaqassasoraakka.

Nunatsinni assammik arsarnermi inuusunnerusut pissartanngorniunnerat nalinginnaasumik marsimi apriilimilu aaqqissuunneqartarpoq, inersimasullu apriilip maajillu akornanni pissartanngorniuttaraluarlutik.

Ilaasortaqarneq ernummatigigaa

Assammik arsartartut kattuffiata nunatsinni pissartanngorniunnerit taamaatiinnarneqarnerat pissutigalugu ilaasortakinnerulertoqarsinnaanera ernumassutigaa.

- Ernumanartumi inissisimareerluta suli ernumanarnerulissaaq.

- Nunatsinni angalaniarneq akisuvoq, ukiumoortumillu pisartumiikkaangatta tamanna pingaaruteqarlunilu pissarsiviulluartarpoq. Sungiusaannarneq unamminissarlu assigiinngillat.

Sisorartartut kattuffiata nunatsinni 2021-mi pissartanngorniuttoqarsinnaanissaa aamma neriuutigaa. Nalinginnaasumik poorskikkunni pissatanngorniuttoqartarpoq. Siulittaasup, Timooq Mølgaardip pissartanngorniuttoqaqqissanngippat ilaasortaqarniarnissaq aamma ernummatigaa.

AAMMA ATUARUK Kim Kielsen slår fast: Der bliver ingen grønlandsmesterskaber i år

- Nunatsinni aappaagu pissartanngorniuttoqanngikkuni ilaasortaqarnerulernissarput naatsorsuutiginngilarput.

Sisorartartut kattuffiata nunatsinnut qanoq amerlatigisut angalasinnaanerannut killilersuisoqarsinnaanissaa kissaatigisinnaavaa. Taamaaliornikkut avataanit tikittunit tuniluuttoqarnissaanut aarlerinartua pissartanngorniuttoqarnerata nalaani annikillineqarsinnaammat.

- Nunatsinnut angalasut nakkutigineqarnerulernissaat neriuutigaarput, timersorneq taamaalilluni aallarteqqinneqarsinnaassaaq, Timooq Mølgaard oqarpoq.

Sisimiuni ukioq manna sangusaarnermi, Nuummi Snowboardimik Aasiannilu ujakkaarnermi pissartanngorniuttoqarnissaanut pilersaaruteqartoqaraluarpoq.

Kalaallit Arsartartut Kattuffiani KAK-mi siulittaasoq, Finn Meinel isumalluarneruvoq. Taanna Naalakkersuisut aalajangiinissaat utaqqiniarlugu oqaatigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat