Sisoraaserluni ooqattaasarneq: Ukaleq Slettemark World Cupimi aatsaat taama angusarissaartigaaq
Tysklandimi Ruhpoldingimi World Cupimi 15 kilometerimut sisamanngornermi unammisoqarpoq tassanilu sisamariarluni ooqattaasarnermi 20-riarluni seqqortoqarpoq.
Ukaleq Slettemark seqqornerni tamani uniunngilaq taamalu apuuttuni 95-iusuni normu 21-tut inissilluni.
Tamanna Ukaleq Slettemarkip World Cupimi maannamut angusaani pitsaanersaavoq 20-nillu World Cupimi pointinnassutaalluni.
- Qasoqaanga siniffimmilu maanna nalallunga. Kisianni nuanneqaaq, Ukaleq Slettemark KNR-mut oqarpoq.
- Sorpassuit ullumi aamma iluatsikkamik, kalaaleq sisoraaserluni ooqattaasartartoq oqarpoq.
World Cupimi malersuunnermut siulliit 60-it akornanniikkami sapaatit akunnerata siuliani annguppoq, ooqattaasarnermilu ingerlalluarluni.
Ingerlarsuinnarpoq
Tysklandimi 15 kilometerimut unammisoqarnerani sisamariarlutik katillugit 20-riarlutik seqqorlutik sisamanngornermi ooqattaasarput Ukaleq Slettemark uniunngivippoq kingullerpaamillu seqqortoqalernerani isiginnaartut pissangaqataapput, uniorneq inissinnernik arlalissuarnik appariaataasinnaammat.
- Maanna kingumut qiviarnermi qanorpiaq pisoqarnersoq eqqaamarpianngilara. Immaqa tassa eqqarsaatiginagu ingerlarsuinnarsimavunga, Ukaleq Slettemark oqarpoq.
Inissilluarnerlu illersorniarlugu kingullermik seqqoreernermi illinertigut ingerlaarnissami eqqarsaataa ataasiinnaviusimavoq.
- Tassani eqqarsarpunga: Tassa tamaviannguat ingerlarsortariaqarpunga, Ukaleq Slettemark oqarpoq.
World Cupimi normu 21-nngornermini pointinnannermi saniatigut ataatsikkut aallarluni sapaatiuppat unamminissamut aamma annguppoq.
Ilimaginngisaq pivoq
Maanna ukiumut unammiffiusuni anguniakkamini pitsaasumik killiffeqalereerpoq.
- Anguniakkanni alloriarujussurpunga ukioq unammiffiusoq aallartisimatsiaannaraluartoq. Aappaa tassaavoq malersuunnermut anngunneq, taannalu anguara. Aappaallu tassa World Cupimi pointinnannissaq.
- Taannaannaanngilarli; sapaatiuppat ataatsikkut aallarluni unammeqataanissamut immikkut periarfissinneqartunut ilaavunga tamannalu ilimagisimanngikkaluarpara, Ukaleq Slettemark oqarpoq.
Inersimasuni februaarimi VM-qataassaaq, martsillu aallartilaarnerani inuusuttuni VM-qataassalluni. Inuusuttut VM-qarnerannit toqqaannartumik aallakaatitsinissamut KNR-TV akuersissummik pissarseqqammivoq.