Sisimiut Tusaataat suli 5 millionit koruuninik akiitsoqarpoq

Sisimiut Tusaataat ukiut tallimat matuma siorna katillugit 11 millionit koruuninik akiitsoqarpoq ilaatigut bingornermut akitsuutinut, 2,8 millionit koruuninik aamma isertitat akileraaruserneqarnerannut, 1,2 millionit koruuninik akiitsoqarlutik. Ullumikkut ukiut tallimat qaangiunnerini suli akiitsut tamakkerlugit akilerneqanngillat, tamannalu ilungersunartoq, Sisimiut Tusaataanni pisortaq, Jens Klaus Lennert, Kasik oqarpoq.

Allattoq Apollo Jeremiassen

decembarip 14-at 2015 03:56

- Ukiut tallimat ingerlanerini akiitsugut maanna 5 millionit koruunit qulaatilaarlugit apparnikuupput.

Sisimiuni radioqarfiup akiitsui suli amerlagaluartut taamaattoq radioqarfik suli ingerlavoq. Tamannali oqittuinnaanngitsoq, Jens Klaus Lennert, Kasik oqarpoq.

- Inuiaqatigiinni aningaasarliorneq radioqarfitsinni aamma malugaarput sutigut tamatigut soorluttaaq tamanna suliffeqarfinni allani aamma malugineqarsimasoq.

Inuit qarasaasiatigut attaveqaataat unammillerput

Ussassaarutinit isertitat ukiuni kingullerni annertuumik ikilisimapput, ilaatigut inuit qarasaasiatigut attaveqarfii atorlugit, soorlu facebookikkut suliffeqarfiit ussassaarisalersimanerat, Sisimiut Tusaataannit unammilleruminaassimalluni.

- Niuertarfiit radioqarfitsigut ussassaarisarneri ukiuni kingullerni assut annikillisimavoq, ingammik internettikkut soorlu facebook aqqutigalugu periarfissat annertusiartorneri unammilertigilersimavagut, Jens Klaus Lennert, Kasik oqarpoq.

Aamma atuaruk Sisimiut Tusaataat akiitsorpassualik

Sisimiut Tusaataat ukiuni kingullerni 22-ni ataavartumik illoqarfimmut tusagassaateqartartoq, ukiut ingerlaneranni illorsuarmik pisiaqarpoq, tamannalu aningaasartuutinut ilaalluinnarluni. Tamassuma saniatigut akiitsut akilersorneqarnerat aamma ingerlanneqarluni.

- Taakku nalinginnaasumik ingerlatsinikkut akilersorneqarput. Tassa ukiuni 22-ni ingerlatsinitsinni pisortanit tapiiffigineqarata akiitsugut nammineerluta appariartortippagut.

Aviisi Sivdlek suleqatigineqarpoq

Radioqarfiullu aningaasartuutaat ikilisarniarlugit illoqarfiup aviisia Sivdlek suleqatigineqarpoq.

- Soorlu allaffissorneq ataatsimoorupparput taamatullu pilerisaarinermut allaffissornertaa ataatsimoorullutigu. Taamaaliornikkut immitsinnut aningaasartuutinut oqilisaappugut.

Aviisimik suleqateqarnerup pilersippaa, Sisimiut Tusaataata akiitsoqaraluarluni suli ingerlanneqarsinnaanera.

- Soorlu ilaatigut aaqqissuussinerit assigiinngitsut ingerlattarpavut, nipilersornerusinnaapput imaluunniit aliikkusersuinerusinnaallutik, Sisimiut Tusaataanni pisortaq, Jens Klaus Lennert, Kasik oqarpoq.