Sisimiut Tusaataat akiitsorpassualik
Sisimiut Tusaataat ukiuni kingullerni tallimani ukiumoortumik ataatsimeersuarsimanani, marlunngormat ataatsimeersuarmat, ilaasortanit 2050-iusunit taamaallaat 28-t ataatsimiigiarput.
Sisimiut Tusaataata, aamma Nuummi illoqarfiup radiuanik Nuuk FM-imik piginnittuusup, ilaatigut bingortitsinermut akiliutissat 2,8 millionit koruunit akiligassarai aamma akileraarutinut A-nut akiligassat 1,2 millionit koruuniupput. Tamatuma saniatigut Sisimiuni radioqarfiup illutaa aamma akiitsoqarfigineqarpoq.
Naak naatsorsuutit pitsaavallaanngikkaluartut, ukiumoortumik ataatsimeersuaqataasut siulittaasup Søren Alaufesenip nalunaarutaa aamma pisortap Jens Klavs Lennertip naatsorsuutit saqqummiussai akuersissutigaat.
- Taamarsuaq akiitsoqarnerput soorunami pitsaanngilaq, tamatumunngali peqatigitillugu oqaatigissavara, ukiumut kaaviiaartitavut 15 millionit koruuniummata, pigisavullu nalillit arlaqarmata, soorlu atortunik illuutitsinnilu nalilinnik pigisaqarpugut, Jens Klavs Lennert KNR-imut oqarpoq.
Upernaaru ukiumoortumik ataatsimeersuartoqaqqinnissaata tungaanut Karl Mikkelsen siulersuisuni siulittaasutut qinigaavoq.
Tamatuma tungaanut siulersuisut ulluinnarnilu ingerlatsisut iliuusissatut pilersaarummik suliaqassapput, illoqarfiup radiuata ingerlalluaqqilernissaa anguniarlugu.
- Ukiuni kingullerni arlalitsigut naleqqussaareerpugut, matumani aningaasartuutikillisaalluta, ilaatigut sulisuvut ikilisarlugit, siulersuisullu nutaat peqatigalugit tamanna ingerlateqqinniarparput, radioqarfiup pisortaa Jens Klavs Lennert oqarpoq.