Upalungaarsimanermi nalunaarut: Sisimiut Kangerlussuullu akornanni pisuttut aqqutaata ilaata pisuffigineqannginnissaa inassutigineqartoq
Sisimiut Kangerlussuullu akornanni pisuttut aqqutaata ilaa pisuffigineqassanngitsoq, Qeqqata Kommuniani qatserisartut upalungaarsimanermi nalunaarummi innersuussutigaat.
Allattoq Aaqqissuisoqarfik / Redaktionen
juulip 15-at 2019 17:02
Sisimiut avannaata kangiani Kangerluarsuk Tulliup qinnguani nunap ikuallannerata pujua annertooq pissutigalugu Qeqqata Kommunia Qatserisartut matumuuna innersuussutigaat Sisimiut Kangerlussuullu akornanni pisuttut aqqutaata, Arctic Circle Trail, ilaani Kangerluarsuk Tullermiit Eqalugaarniarfik – Nerumaq aqqutigalugu – pisuffigineqassanngitsoq.
Innersuussutigineqassaaq aqqut Kangerluarsuk Tullermiik Eqalugaarniarfimmut Sarfannguatigoortoq atorneqassasoq. Aqqutaa inussunnik nalunaaqutsersugaavoq, maluginiaqquneqarput, Qeqqata Kommuniani upalungaarsimanermut pisortaq allappoq.
