Sisimiut avannaatungaani nuna sajuttoq
Sisimiormiut ippassaq unnukkorsioqqammitsiarlutik qanngulorujuttorsuarmik tusaasaqarsimassajunnarsipput.
Danmarkimi Kalaallit Nunaannilu ujarassiuutut misissuisarfimmit GEUS-imit nunap sajussimanera uppernarsarneqarpoq.
- Nipersuaq qanngulussuaq takkuteriataarami nipitoorujussuulluni. Kisianni 10 sekundit missaannaaniippoq, Sisimiuni innuttaasut ilaat Arne Mogensen nunap sajunnera pillugu oqaluttuarpoq.
Nunalli sajunnera maluginagu nipersuaq kisiat tusaasimavaa.
- Immaqa soorlu nuna attuussaappalulluni imaluunniit nakkakaarpalulluni pinngikkuni. Soorlu nipittoriartortarpoq sunaluunniit motoori aallartikkaanni. Soorlu nipittoriartortutut sakkortusiartortutut nipeqarami, Arne Mogensen oqarpoq.
Sisimiut avannaatungaanit 25 kilometerinik avannarpasitsigisumik nalunaaqutaq arfineq qaangerlugu tanneq sisamat nuna sajussimasoq Danmarkimi ujarassiuutut misissuisarfimmi GEUS-imi ilisimatuup Thomas Fossip oqaatigaa.
Sajunnera sakkukittunnguusoq
- Naliginnaasuuvoq. Kalaallit Nunaanni sumiiffimmi tassani nuna sajukulavoq. Immikuullarinngilaq, ritcherillu uuttortaataa malillugu 2,7-tut sakkorsuseqarluni. Nunap sajunnera sakkukitsuaraavoq, Thomas Foss oqarpoq.
Nunallu sajunnera annikissimammat Arne Mogensenip nipaa kisiat tusaasimaa:
- Tamaallaat nipaannarsuaq kisiat tusaavara. Siornatigut nuna sajukkaangat nateq sajuttoq malugisarnikuuara, maanna nateq sajunneranik maluginianngilara iikkallu naamik. Kisianni nipaannarsua kisiat tusaavara, nippaarissorujorujussuuvoq, Arne Mogensen oqarpoq.
Soorlu lastbiilit sanioqqukkaangata
Nunatsinni sumiiffimmi tassani nunap sajuttarnera qaqutigoortuunngitsoq ujarassiuup oqaatigaa. Sajunnerlu sakkukikkaluartoq ilaatigut malugineqarsinnaasarnerarpaa biilerujussuarnullu assersuullugu.
- Issiaartilluni eqqissisimaaraanni, nunap sajunnera sakkukitsoq malugineqarsinnaavoq. Soorlu assersuutigalugu aqqusinikkoortilluni biilerujussuit sanioqqukkiartortillugit nunap sajulaarnera malugineqarsinnaasarpoq. Nunap sajunnera tassunga eqqaanarsinnaavoq, GEUS-imeersoq Thomas Foss oqarpoq.
