Sisimiuni Palasip qaqqaata ataani ullaaq ikuallattoqarpoq
Politiit angummit ullaaq arfineq-marluk qaangerlugu tanneq pingasunut kalerrinneqarput, angutip maluginiarsimavaa mittarfiup aqqutaaniit 4-500 meterinik ungasitsigisumi pujortorujussuusoq, Sisimiuni Politeeqarfimmi politeeq, Claus Etzerodt, ilisimatitsivoq.
Claus Etzerodt angutip putsumik takunniffigisaanut takusaavoq, nunalu 300 kvadratmeterisut annertutigisoq ikuallattoq naammattoorlugu. Politiassistentip ikuallattumut anngunnerata nalaani qatserisartut qatserutit marluk atorlugit tikiupput, ikuallattorlu nalunaaquttap akunnerata ataatsip ingerlanerani qaminneqartoq, Claus Etzerodt oqarpoq.
- Inunnik navianartorsiortoqanngilaq, ikuallannermullu suna pissutaanersoq oqaatigiuminaassaaq, tassa inuit mianersuaalliorsimanersut imaluunniit igalaamerngit seqinermit kissattoornerat pissutaasimanersoq, politeeq oqarpoq.
Qaqqanili massakkut tassa panertorujussuuvoq, innuttaasullu pinngortitarsuarmiitsillutik mianersoqqissaarnissaannik kaammattuinnarsinnaavavut, Sisimiuni politiit kaammattuipput.
- Sisimiuniinnaagunanngitsoq, sinerialli tamaat eqqarsaatigalugu taama kaammattuivugut. Neriuinnarniartalu erniinnaq siallilerumaartoq, Claus Etzerodt naggasiivoq.
