Sisimiuni Kangerlussuarmilu nalunaarasuartaatitigut attaveqartoqarsinnaanngilaq
Tassa sumiiffinni taakkunani oqarasuaatit angallattakkat, oqarasuaatit nalinginnaasut, internetikkut, VHF-ikkut attaveqartoqarsinnaanngilaq aamma KNR radio tv-lu attaveqanngillat.
Sakkortusaaveqarfimmi DYE ONE-imi attaveeruttoortoqarpoq aamma tamaani silarlunnera patsisigalugu ajoqutaasoq iluarsiniarlugu sakkortusaavik qulimiguulimmik orninneqarsinnaanngilaq, aatsaallu aqagu taamaaliortoqarsinnaassaluni.
Kangerlussuarmi oqarasuaatit nalinginnaasut atorsinnaapput, tassa Københavnikkoortumik qaammataasamut attavilerneqarmata.
Nunaqarfimmi Itillimi oqarasuaatit nalinginnaasut atorlugit nunaqarfiup iluani Sisimiunullu sianertoqarsinnaavoq.
Sisimiuni oqarasuaammik nalinginnaasumik illoqarfiup iluani sianertoqarsinnaavoq, soorlu aamma oqarasuaammik nalinginnaasumik illoqarfinnut allanut aamma sianertoqarsinnaasoq. Attaveqaatit allat tamarmik atorsinnaanngillat.
Nunaqarfik Sarfannguit sutigut tamatigut attaveqarfigineqarsinnaanngilaq.
TELE-POST King Air-imik aamma qulimiguulimmik attartorluni teknikerinik Nuummiit Kangerlussualiartitseriarluni sakkortusaavimmut Sisimiut kujatinnguanni Qaqqatoqqamiittumut DYE ONE-mukartitsissaaq. Silalli ajornera pissutigalugu siusinnerpaamik aqagu ullaakkut nalunaaqutaq arfineq marlunut aatsaat timmisartuussisoqarsinnaassaaq. Attaveqaateqarnerup qaqugu iluarsineqarsinnaanera maannakkuugallartoq oqaatigineqarsinnaanngitsoq TelePostimit ilisimatitsissutigineqarpoq.
