Sisimiuni inuusuttut Inuusuttut Illoqalissapput
Inuusuttut siunissami imminnut pilersorsinnaalernissaat anguniarlugu Inuusuttut Illuannik pilersitsinissaq siunertaavoq.
- Siunertaraarput inuusuttut siunissami nammineersinnaanerunissaat aallaavigalugu inuusunnerminiik suleriaatsinik assigiinngitsunik ilinniarnissaat Inuusuttut Illuat aqqutigalugu. Tassani eqqarsaatigaagut inuusuttup sulisarnermini eqqarsaatigisassai, aningaasatigut assigiinngitsutigut inissisimaneq eqqarsaatigisassaat, taavalu ulluinnarni inuunermut qanoq piorsarsimassutsikkullu qanoq ingerlanissartik nammineq aqussinnaalernissaat siunertaavoq.
Hans Frederik Olsen taama oqarpoq.
Inuusuttut illuat piareerpat inuusuttut Sisimiuni najugaqartut suliassaaleqinavianngitsut, Hans Frederik Olsenip oqaatigaa.
- Tassa inuusuttut atorniarpagut uani ingerlatsisutut Inuusuttut Illuannik, inuusuttut aamma atorniarpagut piniagassanik piniaqatigalugit, uani Inuusuttut Illuanni nammineerlutik atortunik tuniniagassanik nerisassanik imaluunniit eqqumiitsulianik assigiinngitsunillu tuniniaasinnaanerminut nammineq atugassaminnik pilersitsinissaanut, naggataagutigullu aamma nammineq tuniniarlugit aningaasarsiorfiginissaanik aqqutissiuunniarpagut.
Hans Frederik Olsen taama oqarpoq.
Inuusuttut siunissami imminut pilersorsinnaalernissaanik piginnaanngorsaanerup saniatigut inuusuttut qanimut attaveqarfigineqartassapput.
Inuusuttut siunissami pilersaarutaat pillugit inuusuttoq oqaloqatigineqartassaaq. Akisussaaffimmik ataqqinninnermillu ilinniartinneqartassapput, allanillu aamma inuusuttumut iluaqutaasinnaasunik inuusuttoq oqaloqatigalugu pilersaarusiortoqartassalluni.
Sisimiuni inuusuttut 16-niit 25-nik ukiullit 1.200 missaanniipput. Ukiullu qulit ingerlaneranni Sisimiuni ilinniarfiit amerlissammata, inuusuttut amerleriarnissaat Sisimiuni Sanaartornermik Ilinniarfimmi pisortaasup Jokum Møllerip ilimagaa.
Inuusuttut Illussaat 12 millionit koruunit missaanik aningaasartuutigineqarpoq. Sisimiuni Inuusuttut Illussaat katillugu 550 kvadrat miiterinik annertugissaaq.
Sisimiuni inuusuttut ornittagaat Nutaraq taarsiullugu Sisimiuni Inuusuttut illuat pilersinneqarpoq.
Sisimiuni Inuusuttut Illuat ukioq manna augustip aallaqqaataani atoqqaarfissiorneqassaaq. Naalakkersuisut Siulittaasuata Aleqa Hammind Inuusuttut Illuanik ammaasuussaaq oqaluagiassallunilu.
