Sisimiuni imeqarfiup eqqaani assigaq aqqusaarlugu qamuteralaat ingerlasinnaanerat akuerineqartoq

Mannami tikillugu Sisimiut eqqaanni imeqarfiup eqqaani assikkami qamuteralannik ingerlaarneq inerteqqutaagaluarpoq.

Taamaattoq imeqarfiup eqqaa assigaq aqqusaaqqaarnagu qamuteralannik illoqarfiup timaanukarnissaq ajornarpoq. Taamaattumik illoqarfimmi qamuteralaatillit 700-t missaaniittut illoqarfiup timaanut angalaarniartillutik inatsimmik unioqqutitsisariaqartarsimapput.
 
Taamaammat Naalakkersuisut Sisimiut imeqarfiata eqqaani assigaq pillugu immikkut maleruagassaliorput. Immikkut aqqutissakkoorlutik imeqarfiup eqqaani assigaq aqqusaarlugu qamuteralaat akuerisaallutik ingerlasinnaalissallutik.

Tamanut iluaqutaassaaq
- Qamuteralaat sumi tamaani ingerlaarunnaarlutik illernit nalunaaqutsersorneqartut aqqutigisalerpatigit, Sisimiuni imeq imigassaq pitsaanerusumik illersorneqalissaaq. Qamuteralaat mingutsitsisinnaanerat annikitsuutillugu taamaallaat ingerlaartarnissaat maleruagassani nutaani qulakkeerneqassaaq, Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko taama oqarpoq.
 
Tamatumunnga peqatigitillugu imeqarfiup eqqaani assikkami illernit piareersarneqarsimasut atorlugit sisoraatinik ujakkaartoqarsinnaalissaaq. Taamaalilluni aamma illernit akuerineqartut atorneqalerpata imeqarfiup eqqaani assersorneqartukkut Arctic Cirkel Race ingerlanneqarsinnaalissaaq.
 
Kommuni qamuteralaat ingerlaffigisinnaasaanni nalunaaqutsersuilluni aallartissaaq, soorlu aamma sisoraatinik ujakkaartarfiit nalunaaqutsersorneqassasut. Nalunaaqutsersuinerlu naammassineqarpat qamuteralaat illinilersuutillu imeqarfiup eqqaani assikkami aatsaat ingerlasinnaalissapput.