Sisimiuni erngup nukinganik nukissiorfittaarput

Sisimiut innaallagissamik erngup nukinganeersumik pilersorneqarsinnaanerat, 1970-ikkunnili takorloorneqalerpoq. pilersaarusiornerata missingersuusiornera 1992-imi piareerneqarpoq, aatsaalli 2006-imi aningaasaliiffigineqarluni.

Erngup nukinganik nukissiorfik Sisimiuniit 27 kilometerinik avannarpasinnerusumiippoq, Tasersuarmiillu 5 kilometerinik takissusilimmik nunap iluatigut sulluliortoqarluni. Erngup nukinganik innaallagissiorfik ukiuni pingasuni sananeqarpoq, koruunillu 500 millionit missaannik akeqarluni.

Taamaattorli erngup nukinganik innaallagissiorfiliorneq aningaasatigut avatangiisinullu iluaqutaasussaavoq. Taassumammi taarserpaa illoqarfiup innaallagissiorfia, 2008-mi uuliamik ukiumut 6,5 millionit liiterimik 28 millionit koruuninik nalilimmik atuisoq. Maanna taamatut aningaasartuuteqartoqarunnaassaaq, tamatumalu saniatigut uuliamik atuinikkut CO2-mik mingutsitsisoqarunnaassalluni.

Qeqqata Kommuniani borgmesteri Hermann Berthelsen ullumikkut nuannaaqaaq:

- Taamaattumik nukissiuuteqalernitsigut CO2-mik mingutsitsinitsinnut iliuuseqarnerput nunarsuarmioqatitsinnut takutissinnaanngussavarput. Tassami Sisimiormiumut ataatsimut agguaqatigiissillugu ukiumut CO2, 3 tonsi katillugit 21.000 tonsit aniatittarunnaassagatsigik, tamannalu ilorraap tungaanut ingerlanitsinnik nalunaarutiginninneruvoq, Hermann Berthelsen Radioavisimut oqarpoq.

Ammarnersiornermi Namminersorlutik Oqartussat, Qeqqata Kommunia, Nukissiorfiit, Pihl & Søn, Ístak tusagassiorfiillu peqataatitaqassapput.