Sisimiuni eqqakkat immikkoortitertalerpaat
Eqqakkat pillugit aaqqissuussineq EQQAKK@T sapaatip akunnerat naanerani siuliani aallartimmat Sisimiuni eqqakkanik immikkoortiterisarneq aallartippoq. Puiaasat, qillertuusat eqqagassallu ulorianartut tamarmik immikkut containerinut iliorarneqartalerput. Kommunimiit neriuutigineqarpoq taamaasiornikkut eqqakkat ulorianartut ikuallaavimmut annguttannginnissaat.
- INI inissiaqarfiit eqqaannut containerinik inissiivoq kommunimiillu illoqarfimmi inuit katersuuttarfiinut containerinik aamma inissiivugut. Qillertuusat atoqqitassanngorlugit tunineqarsinnaapput igalaamerngillu aqqusinerni asfaltiterinermut atorsinnaallutik. Aamma periarfissaqarpoq igalaamernit Europamut tuneqqittarnissaat, maannakkorpiarli akit appasippallaarmata tamanna imminut akilersinnaanngilaq, Jacob S. Lundgaard Qeqqata kommunianiit oqarpoq.
Piffissami sivisuumi ajornartorsiutaasimavoq batterit elektronikimulu atortorissaarutit isumannaatsumik eqqartarnissaat. Maannali tamanna iluarsineqarpoq.
- Innuttaasunit suliniut ilassilluarneqassappat tassalu kukiit qalipaataannut piiaat, klorin allallu eqqakkat ulorianartut eqqaavimmut naliginnaasumut ikinaversaarlugit avatangiisit qajassuunnissaannut containerinut ikisaraanni avatangiisit iluaquserneqassapput. Ikuallaaviup angummaniapiloortarnera taamaasilluta iluaqusersinnaavarput puiaasat qillertuusallu containerinut ikineqartalerpata maangaannaq eqqarnagit, Jacob S. Lundgaard oqarpoq.