Sisimiormiut coronamut malittarisassat pillugit: Qatsunnarsivoq, kisianni...
Nunatsinni illoqarfiit annersaata tulliani tunillatsissimasut amerliartuinnavipput.
Qeqqata Kommuniani tunillatsissimasut piffissami matumani 27-upput, tunillatsissimasullu arfininngormat paasineqartut kingulliit arfineq-pingasuupput. Taakku tamarmik Sisimiuni tuniluuffiusunut oqartussanit nakkutigineqartunut qanillisimanngillat.
Makkua ornissagukkit, malittarisassat naapertorlugit marloriarlutit tuikkut kapitinnikuussaatit imaluunniit coronamik tunillatsinnikuunnginnermut uppernarsaat, siisunerpaamik akunnernik 48-nik pisoqaassusilimmik tigummiassaatit:
-
Sutorniartarfiit, cafét, imerniartarfiit, diskotekit assigisaallu, silamilu nunaminertat taakkununnga atasut.
-
Kulturisiorfiit – soorlu illorsuit kulturisiorfiit, filmertarfiit, katersugaasiviit kiisalu inersuit saqqummersitsiviit.
-
Innuttaasut illuutaat assigisaallu.
-
Atuakkanik atorniartarfiit.
-
Illup iluani siamilu timersortarfiit – soorlu init inersuillu timersortarfiit, naluttarfiit, timigissarfiit arsaattarfiillu.
-
Nujaleriviit, tagiaasartut, pinnersarfiit assogisaallu.
Suliffeqarfinni arlalinni, paaqqutarinniffinni napparsimmavimmilu allaat tuniluuttoqarpoq.
Tamanna pissutigalugu Sisimiuni killilersuinerit sukannersut sisamanngormat atuutilersinneqarput: Innuit amerlanerpaamik 20-t katereqqusaapput tamanillu ornigarneqarsinnaasuni assersuutigalugu pisiniarfinni, napparsimmavimmi, bussini taxanilu kikkut tamarmik qanermut assiaquteqassallutik.
Neriniartarfimmut imerniartarfimmulluunniit iserniartut tamakkiisumik akiuussutissamik kapitissimasariaqarput imaluunniit coronamik tunillatsissimannginnermut uppernarsaammik sivisunerpaamik akunnernik 48-nik pisoqaassusilimmik takutitsisariaqarlutik.
Qatsunnangaatsiarttullu KNR-ip Sisimiuni naapitaat isumaqarput.
Foto: KNR
- Qatsunnarsivoq corona taamak pissaaneqartigilermat, kisianni immitsinnut paarinissarput pingaaruteqartorujussuuvoq, tamanna allaanerusinnaanngilaq, Jon Bjerregaard oqarpoq.
- Kalaallit Nunaat ataatsimut isigalugu pitsaaqutigaa, pinngortitaq kusanartoq orniinnarsinnaagatsigu, tassuunami unitsinneqanngilagut.
Foto: KNR
Lisette Hansen:
- Tunillatsissimanngikkaluarpugut, ajunngikkaluarluta. Kisianni aningaasat tungaasigut annaasaqarluta, sapaatip akunnera karantæneratta annaasaqanngittussatut oqariarlutik annaasaqaratta uuminaqaaq, attavissaanatillu tamakkulerisut.
Foto: KNR
Arnaq Petersen:
- Imerniartarfiit, katerisimaartarfiit, tamakkua matoorarlugit ajunnginnerussagaluarami. Taamak tuniluuttut amerlatigisut, taanna oqarpoq.
Sisimiuni misissuisarfik nutaaq ullumi ammarpoq. Sisimiunimi inuit covid-19-imut misissortinniarlutik napparsimmavimmut kisimi sianersinnaanerat pissutigalugu siarnguttoqangaatsiarpoq.
Tamannalu illoqarfimmi tuniluuttoqarnera eqqarsaatigalugu pitsaanngilaq, taamaammat misissuisussaqarnerusariaqartoq, Qeqqata Kommuniata oqaatigaa.
AAMMA ATUARUK Paasissutissat: Nunatsinnut angalasut tamakkiisumik akiuussuserneqarsimassasut Sisimiunilu malittarisassat nutaat
Sisimiuni atuarfiit aasaarnerani atuanngiffeqareernerani ullumi ammaqqittussaagaluarput. Coronmilli tuniluuttoqarnerata tamanna akornuserpaa, taamaammat Minngortunnguup Atuarfia aamma Nalunnguarfiup Atuarfia sapaatip akunnerata tulliani aatsaat ammassapput.
Killilersuinerit nutaat aggustip ulluisa 24-annut atuutissapput. Taakku tuniluuttoqarfiusunut Aasiannut, Upernavimmut kiisalu nunaqarfinnut qulingiluanut Upernaviup pigisaanut aamma atuupput.
Malittarisassat ilarujussui nunatta sinnerani qasukkarneqarnikuupput, qanermullu assiaquteqarnissaq piumasaqaataanani. Aamma katerinnermi inuit amerlanerpaamik 20-oqqusaanerat atorunnaarsinneqarnikuuvoq.
